ਆਰਟਿਸਟਸ ਐਕਨਾਲੇਜਮੈਂਟ
ਕਲਾ ਇੱਕ ਕਹਾਣੀ ਦਾ ਵਰਣਨ ਕਰਦੀ ਹੈ
ਕਲਾ ਸਾਡੇ ਆਲੇ ਦੁਆਲੇ ਦੇ ਸਮਾਜ ਅਤੇ ਸੱਭਿਆਚਾਰਾਂ ਬਾਰੇ ਸਿੱਖਣ ਅਤੇ ਸੰਸਾਰ ਬਾਰੇ ਸਾਡੀ ਆਪਣੀ ਸਮਝ ‘ਤੇ ਵਿਚਾਰ ਕਰਨ ਵਿੱਚ ਸਾਡੀ ਮਦਦ ਕਰਨ ਲਈ ਇੱਕ ਪ੍ਰਭਾਵਸ਼ਾਲੀ ਸਾਧਨ ਹੈ।
ਬੀ.ਸੀ. ਭਰ ਵਿੱਚ, ਕਲਾਕਾਰ ਆਪਣੇ ਰੀਤੀ-ਰਿਵਾਜ਼ਾਂ ਨੂੰ ਮਾਨਤਾ ਦੇਣ ਅਤੇ ਸਮਾਜ ਵਿੱਚ ਆਪਣੇ ਭਾਈਚਾਰੇ ਦੀ ਤਰੱਕੀ ਲਈ ਆਪਣੀ ਕਲਾ ਦੀ ਵਰਤੋਂ ਕਰ ਰਹੇ ਹਨ। ਉਨ੍ਹਾਂ ਦੀਆਂ ਚਿੱਤਰ ਅਧਾਰਤ ਕਹਾਣੀਆਂ (visual stories) ‘ਤੇ ਚਾਨਣਾ ਪਾਉਣ ਲਈ, ਅਸੀਂ ਕਲਾਕਾਰਾਂ ਨੂੰ ਨਸਲਵਾਦ-ਵਿਰੋਧੀ ਡੇਟਾ ਐਕਟ ਦਾ ਸਮਰਥਨ ਕਰਨ ਵਾਸਤੇ, ਆਪਣੇ ਕੰਮ ਨੂੰ ਸਾਂਝਾ ਕਰਨ ਲਈ ਕਿਹਾ। ਅਸੀਂ ਉਨ੍ਹਾਂ ਦੇ ਯੋਗਦਾਨ ਲਈ ਉਨ੍ਹਾਂ ਵਿੱਚੋਂ ਹਰੇਕ ਦੇ ਧੰਨਵਾਦੀ ਹਾਂ।
ਆਰਿਟਸਟਾਂ ਨੂੰ ਮਿਲੋ
ਐਡਮ ਲਿਉਇਸ (Adam Lewis)
ਐਡਮ ਲਿਉਇਸ ਕੇਪ ਮੱਜ ਵਿਲੇਜ, ਬੀ.ਸੀ. ਤੋਂ ਇੱਕ Kwakwaka’wakw ਕਲਾਕਾਰ ਹਨ। ਐਡਮ ਆਪਣੇ ਪੂਰੇ ਜੀਵਨ ਭਰ ਇੱਕ ਕਲਾਕਾਰ ਰਹੇ ਹਨ ਜਿਨ੍ਹਾਂ ਦੀ ਕਲਾ ਦੀਆਂ ਜੜ੍ਹਾਂ ਐਕਰੀਲਿਕ ਕੈਨਵਸ ਚਿੱਤਰਾਂ ਅਤੇ ਐਰੋਸੋਲ ਮਿਊਰਲਾਂ ਵਿੱਚ ਵੱਸਦੀਆਂ ਹਨ। ਐਡਮ ਦੀ ਨੌਰਥਵੈਸਟ ਕੋਸਟ ਦੇ ਫਾਰਮਲਾਈਨ ਕੰਮ ਵਿੱਚ ਡੂੰਘੀ ਦਿਲਚਸਪੀ ਹੈ, ਜਿਸ ਨਾਲ ਉਹ ਆਪਣੇ ਪੁਰਖਿਆਂ ਅਤੇ Laichkwiltach ਲੋਕਾਂ ਨਾਲ ਜੁੜਨ ਦੇ ਸਮਰੱਥ ਹੁੰਦੇ ਹਨ।
ਸੇਮ ਸੇਮ (Same Same)
“ਸੇਮ ਸੇਮ” ਸਾਰੇ ਲੋਕਾਂ ਦੀ ਸਾਂਝੀ ਮਨੁੱਖਤਾ ਨੂੰ ਦਰਸਾਉਂਦੀ ਹੈ। ਇਹ ਵਿਅਕਤੀਗਤ ਮਤਭੇਦਾਂ ਦੀ ਸੁੰਦਰਤਾ ‘ਤੇ ਚਾਨਣਾ ਪਾਉਂਦੀ ਹੈ ਅਤੇ ਇਸ ਗੱਲ ਨੂੰ ਮਾਨਤਾ ਦਿੰਦੀ ਹੈ ਕਿ ਕਿਵੇਂ ਵਿਭਿੰਨ ਸੱਭਿਆਚਾਰ ਅਤੇ ਜ਼ਿੰਦਗੀ ਜਿਉਣ ਦੇ ਵੱਖ-ਵੱਖ ਤਰੀਕੇ ਸਾਡੀ ਦੁਨੀਆ ਨੂੰ ਕੀਮਤੀ ਬਣਾਉਂਦੇ ਹਨ।
ਐਡਮ ਦਾ ਹੋਰ ਕੰਮ ਦੇਖਣ ਲਈ, adamlewisart.com ‘ਤੇ ਜਾਓ
ਅਨੀਤਾ ਚੇਂਗ (Anita Cheung)
ਅਨੀਤਾ ਚੇਂਗ (ਨੀਟਸ) ਇੱਕ ਕਲਾਕਾਰ, ਚਿੱਤਰਕਾਰ ਅਤੇ ਡਿਜ਼ਾਈਨਰ ਹਨ। ਰਿਫਿਊਜੀਆਂ ਦਾ ਬੱਚਾ ਹੋਣ ਦੇ ਨਾਤੇ, ਉਹ xʷməθkʷəy̓əm (Musqueam), Sḵwx̱wú7mesh (Squamish), ਅਤੇ səlilwətaɬ (Tsleil-Waututh) ਨੇਸ਼ਨਜ਼, ਜਿਨ੍ਹਾਂ ਨੂੰ ਵੈਨਕੂਵਰ, ਬੀ.ਸੀ. ਵਜੋਂ ਵੀ ਜਾਣਿਆ ਜਾਂਦਾ ਹੈ, ਦੀ ਗੈਰ-ਇਜਾਜ਼ਤ ਲਈਆਂ ਪਰੰਪਰਾਗਤ ਜ਼ਮੀਨਾਂ ਵਿੱਚ ਕੰਮ ਕਰਨ ਅਤੇ ਰਹਿਣ ਲਈ ਧੰਨਵਾਦੀ ਹਨ।
ਅਨੀਤਾ ਹਮੇਸ਼ਾ ਆਪਣੇ ਆਲੇ-ਦੁਆਲੇ ਦੀ ਦੁਨੀਆ ਵਿੱਚ ਅਦਭੁਤ ਅਵਸਥਾਵਾਂ ਦੀ ਭਾਲ ਵਿੱਚ ਰਹਿੰਦੇ ਹਨ। ਨਤੀਜੇ ਵਜੋਂ, ਉਨ੍ਹਾਂ ਦਾ ਕੰਮ ਸਨੇਹ-ਭਰਿਆ ਅਤੇ ਚੰਚਲ ਹੁੰਦਾ ਹੈ ਅਤੇ ਉਨ੍ਹਾਂ ਲੋਕਾਂ ਲਈ ਬਣਾਇਆ ਗਿਆ ਹੈ ਜੋ ਦਿਲੋਂ ਨੌਜਵਾਨ ਹਨ। ਉਹ ਰਵਾਇਤੀ ਸਮੱਗਰੀਆਂ ਅਤੇ ਕੱਟੇ ਹੋਏ ਪੇਪਰ ਦੀ ਵਰਤੋਂ ਕਰਕੇ ਰੋਜ਼ਾਨਾ ਦੇ ਪਲਾਂ ਦੇ ਅਧਾਰ ‘ਤੇ ‘ਟੈਕਸਚਰਡ ਆਰਟਵਰਕ’ ਬਣਾਉਂਦੇ ਹਨ।
ਮੈਗਨੋਲੀਆ ਡੇਅਡ੍ਰੀਮ (Magnolia Daydream)
ਮੈਗਨੋਲੀਆ ਇੱਕ ਅਜਿਹਾ ਪੌਦਾ ਹੈ ਜੋ ਪਰਾਗਣ ਅਤੇ ਬੀਜ ਪੈਦਾ ਕਰਦੇ ਸਮੇਂ ਅਗਲੇ ਸਾਲ ਦੀਆਂ ਕਲੀਆਂ ਵੀ ਤਿਆਰ ਕਰਦਾ ਹੈ। ਇਸ ਦੀ ਖੂਬਸੂਰਤੀ ਇਸ ਗੱਲ ਵਿੱਚ ਹੈ ਕਿ ਆਉਣ ਵਾਲੀਆਂ ਚੀਜ਼ਾਂ ‘ਤੇ ਭਰੋਸਾ ਕਰਨ ਦੀ ਉਮੀਦ ਨਾਲ, ਅਸੀਂ ਅੱਜ ਦੀਆਂ ਗੱਲਾਂ ਨੂੰ ਭੁੱਲਾ ਸਕਦੇ ਹਾਂ। ਕੁਦਰਤੀ ਸੰਸਾਰ ਦੇ ਇਸ ਗਿਆਨ ਨੂੰ ਧਿਆਨ ਵਿੱਚ ਰੱਖਦੇ ਹੋਏ, ‘ਮੈਗਨੋਲੀਆ ਡੇਅਡ੍ਰੀਮ’ ਮੁਕਤੀ ਵਿੱਚ ਖੂਬਸੂਰਤੀ ਦੀ ਯਾਦ ਦਿਵਾਉਂਦੀ ਹੈ।
ਅਨੀਤਾ ਦਾ ਹੋਰ ਕੰਮ ਦੇਖਣ ਲਈ, neets.art ‘ਤੇ ਜਾਓ
ਐਨਥਨੀ ਜੋਸਫ (Anthony Joseph)
ਕ੍ਰੇਔਨ (crayon) ਦੇ ਰੰਗਾਂ ਵਿੱਚ ਡੂੰਘੀ ਦਿਲਚਸਪੀ ਨਾਲ ਪੈਦਾ ਹੋਏ, ਐਨਥਨੀ ਜੋਸਫ ਮੌਂਟ੍ਰੀਆਲ, ਕਿਊਬੈਕ ਵਿੱਚ ਵੱਡੇ ਹੋਏ, ਜਿੱਥੇ ਉਨ੍ਹਾਂ ਨੂੰ ਸ਼ਨੀਵਾਰ ਸਵੇਰ ਦੇ ਕਾਰਟੂਨ ਅਤੇ ਐਤਵਾਰ ਸਵੇਰੇ ਚਰਚ ਵਿੱਚ ਫਰੈਸਕੋ ਚਿੱਤਰਾਂ ਤੋਂ ਪ੍ਰੇਰਣਾ ਲੈ ਕੇ ਵਿਲੱਖਣ ਦ੍ਰਿਸ਼ ਬਣਾਉਣ ਵਿੱਚ ਦਿਲਚਸਪੀ ਹੋਈ। ਐਨਥਨੀ ਦੇ ਕਲਾ ਪ੍ਰਤੀ ਝੁਕਾਅ ਨੇ ਉਨ੍ਹਾਂ ਨੂੰ ਵੈਨਕੂਵਰ, ਬੀ.ਸੀ. ਆਉਣ ਲਈ ਪ੍ਰੇਰਿਤ ਕੀਤਾ ਜਿੱਥੇ ਉਨ੍ਹਾਂ ਨੇ ‘ਐਮਿਲੀ ਕਾਰ ਯੂਨੀਵਰਸਿਟੀ ਔਫ ਆਰਟ + ਡਿਜ਼ਾਈਨ’ (Emily Carr University of Art + Design) ਵਿੱਚ ਕਲਾ ਅਤੇ ਐਨੀਮੇਸ਼ਨ ਦੀ ਪੜ੍ਹਾਈ ਕੀਤੀ। ਐਨਥਨੀ ਅਜੇ ਵੀ ਵੈਨਕੂਵਰ ਵਿੱਚ ਹੀ ਰਹਿੰਦੇ ਹਨ, ਜਿੱਥੇ ਉਹ ਵੱਖ-ਵੱਖ ਫਾਈਨ ਆਰਟ, ਕੱਪੜੇ ਅਤੇ ਐਨੀਮੇਸ਼ਨ ਪ੍ਰੋਜੈਕਟਾਂ ‘ਤੇ ਕੰਮ ਕਰਦੇ ਹਨ।
ਦ ਕਰੰਪ ਟਵਿਨਜ਼ (The Crump Twins)
‘ਹੋਪ ਥਰੂ ਐਸ਼ਿਜ਼: ਅ ਰੈਕੁਇਅਮ ਫ਼ੌਰ ਹੋਗਨਜ਼ ਐਲੀ ਮਿਊਰਲ’ (Hope Through Ashes: A Requiem for Hogan’s Alley mural) ਦਾ ‘ਦ ਕਰੰਪ ਟਵਿਨਜ਼’ ਸੈਕਸ਼ਨ। ਰੌਨੀ ਅਤੇ ਰੌਬਰਟ ਕਰੰਪ, ਜੋ ਕਿ ਕਰੰਪ ਟਵਿਨਜ਼ ਵਜੋਂ ਮਸ਼ਹੂਰ ਹਨ, ਲੈਅ ਨਾਲ ਧੂਏਂ ਨੂੰ ਚੀਰਦੇ ਹੋਏ ਦਿਖਾਈ ਦੇ ਰਹੇ ਹਨ। ਛੋਟੀ ਉਮਰ ਤੋਂ ਹੀ ਉਹ ਦੋਵੇਂ ਵੈਨਕੂਵਰ ਦੇ ਸਭ ਤੋਂ ਪਛਾਣਯੋਗ ਕਲਾਕਾਰ ਬਣ ਗਏ, ਜੋ ਸਥਾਨਕ ਅਤੇ ਰਾਸ਼ਟਰੀ ਸੰਗੀਤ ਮੰਚਾਂ ‘ਤੇ ਗਾਇਕੀ, ਟੈਪ ਡਾਂਸਿੰਗ ਅਤੇ ਕੌਮੇਡੀ ਨਾਲ ਭਰਪੂਰ ਆਪਣੀ ਕਲਾਕਾਰੀ ਪੇਸ਼ ਕਰਦੇ ਸਨ।
ਐਨਥਨੀ ਦਾ ਹੋਰ ਕੰਮ ਦੇਖਣ ਲਈ, adoworks.net ‘ਤੇ ਜਾਓ
ਡੈਫ਼ਨੀ ਔਡਜਿਗ (Daphne Odjig)
ਡੈਫ਼ਨੀ ਔਡਜਿਗ ਐਬੋਰਿਜਨਲ ਵੰਸ਼ ਦੇ ਇੱਕ ਕੈਨੇਡੀਅਨ ਕਲਾਕਾਰ ਹਨ, ਜੋ 97 ਸਾਲ ਦੀ ਉਮਰ ਵਿੱਚ ਕਲੋਨਾ, ਬੀ.ਸੀ. ਵਿੱਚ ਚੱਲ ਵੱਸੇ। ਡੈਫ਼ਨੀ ਦੀਆਂ ਕੁਝ ਪ੍ਰਾਪਤੀਆਂ ਵਿੱਚ ‘ਨੈਸ਼ਨਲ ਗੈਲਰੀ ਔਫ ਕੈਨੇਡਾ’ (National Gallery of Canada) (2009) ਵਿੱਚ ਪ੍ਰਦਰਸ਼ਨ ਕਰਨ ਵਾਲੀ ਪਹਿਲੀ ਮਹਿਲਾ ਕਲਾਕਾਰ ਹੋਣਾ, ‘ਔਰਡਰ ਔਫ ਕੈਨੇਡਾ’ (Order of Canada) ਅਤੇ ‘ਔਰਡਰ ਔਫ ਬ੍ਰਿਟਿਸ਼ ਕੋਲੰਬੀਆ’ (Order of British Columbia) ਦੀ ਪ੍ਰਾਪਤਕਰਤਾ ਹੋਣਾ, ਸੱਤ ਔਨਰੇਰੀ ਡਿਗਰੀਆਂ ਅਤੇ ਇੱਕ ਨੈਸ਼ਨਲ ‘ਐਬੋਰਿਜਨਲ ਅਚੀਵਮੈਂਟ ਅਵਾਰਡ’ (Aboriginal Achievement Award) ਪ੍ਰਾਪਤ ਕਰਨਾ ਸ਼ਾਮਲ ਹੈ। ਡੈਫ਼ਨੀ ਨੇ ਖੁਦ ਕਿਹਾ ਸੀ ਕਿ “ਜੇ ਇੱਕ ਕਲਾਕਾਰ ਵਜੋਂ ਮੇਰੇ ਕੰਮ ਨੇ ਕਿਸੇ ਤਰ੍ਹਾਂ ਸਾਡੇ ਲੋਕਾਂ ਅਤੇ ਗੈਰ-ਮੂਲ ਨਿਵਾਸੀ ਭਾਈਚਾਰੇ ਵਿਚਕਾਰ ਦਰਵਾਜ਼ੇ ਖੋਲ੍ਹਣ ਵਿੱਚ ਮਦਦ ਕੀਤੀ ਹੈ, ਤਾਂ ਮੈਨੂੰ ਇਸ ਦੀ ਖੁਸ਼ੀ ਹੈ।“
ਦ ਗ੍ਰੈਂਡ ਐਂਟ੍ਰੈਂਸ, 1989 (The Grand Entrance, 1989)
“ਦ ਗ੍ਰੈਂਡ ਐਂਟ੍ਰੈਂਸ” ਇੱਕ ‘ਪਾਓਵਾਓ’ (ਨੌਰਥ ਅਮਰੀਕਾ ਵਿੱਚ ਮੂਲ ਨਿਵਾਸਿਆਂ ਦਾ ਇਕੱਠ) ਦੀ ਸ਼ੁਰੂਆਤ ਵਿੱਚ ਡਾਂਸ ਖੇਤਰ ਵਿੱਚ ਦਾਖਲ ਹੋਣ ਵਾਲੇ ਭਾਗੀਦਾਰਾਂ ਦਾ ਇੱਕ ਚਿੱਤਰ ਹੈ।
ਡੈਫ਼ਨੀ ਦਾ ਹੋਰ ਕੰਮ ਦੇਖਣ ਲਈ, odjig.com ‘ਤੇ ਜਾਓ
ਡੌਰਕਸ ਮਾਰਕਵੇਈ (Dorcas Markwei)
ਡੌਰਕਸ ਮਾਰਕਵੇਈ ਵੈਨਕੂਵਰ, ਬੀ.ਸੀ. ਵਿੱਚ ਅਧਾਰਤ ਇੱਕ ਬਹੁ-ਅਨੁਸ਼ਾਸਨੀ ਕਲਾਕਾਰ ਅਤੇ ਡਿਜ਼ਾਈਨਰ ਹਨ ਜੋ ਰਚਨਾਤਮਿਕਤਾ ਅਤੇ ਕਾਰਜਸ਼ੀਲਤਾ ਨੂੰ ਆਪਸ ਵਿੱਚ ਮਿਲਾਉਣ ਵਿੱਚ ਦਿਲਚਸਪੀ ਰੱਖਦੇ ਹਨ। ਫਾਈਨ ਆਰਟ, ਫੈਸ਼ਨ ਡਿਜ਼ਾਈਨ, ਗ੍ਰਾਫਿਕ ਡਿਜ਼ਾਈਨ ਅਤੇ UX ਡਿਜ਼ਾਈਨ ਵਿੱਚ ਰਸਮੀ ਸਿਖਲਾਈ ਦੇ ਨਾਲ, ਉਹ ਆਪਣੇ ਕੰਮ ਪ੍ਰਤੀ ਇੱਕ ਵਿਆਪਕ ਦ੍ਰਿਸ਼ਟੀਕੋਣ ਲਿਆਉਂਦੇ ਹਨ। ਉਨ੍ਹਾਂ ਦਾ ਵਿਭਿੰਨਤਾ-ਭਰਪੂਰ ਪਿਛੋਕੜ ਉਨ੍ਹਾਂ ਨੂੰ ਆਕਰਸ਼ਕ ਅਤੇ ਉਦੇਸ਼ਪੂਰਨ ਡਿਜ਼ਾਈਨ ਤਿਆਰ ਕਰਨ ਵਿੱਚ ਸਮਰੱਥ ਕਰਦਾ ਹੈ, ਜੋ ਦਰਸ਼ਕਾਂ ‘ਤੇ ਡੂੰਘਾ ਅਸਰ ਪਾਉਂਦੇ ਹਨ। ਇੱਕ ਅਜਿਹੇ ਫ਼ਲਸਫ਼ੇ ਤੋਂ ਮਾਰਗ ਦਰਸ਼ਨ ਲੈਂਦਿਆਂ ਜੋ ਉਪਯੋਗਤਾ ਦੇ ਨਾਲ ਸੁੰਦਰਤਾ ਨੂੰ ਸੰਤੁਲਿਤ ਕਰਦਾ ਹੈ, ਡੌਰਕਸ ਹਰ ਪ੍ਰੋਜੈਕਟ ਵਿੱਚ ਹਮਦਰਦੀ ਵਾਲੀ ਪਹੁੰਚ ਅਪਣਾਉਂਦੇ ਹਨ, ਜੋ ਇਹ ਸੁਨਿਸ਼ਚਿਤ ਕਰਦਾ ਹੈ ਕਿ ਉਨ੍ਹਾਂ ਦਾ ਕੰਮ ਨਾ ਸਿਰਫ ਸੁੰਦਰ ਹੈ ਬਲਕਿ ਮਹੱਤਵਪੂਰਨ ਅਤੇ ਪ੍ਰਭਾਵਸ਼ਾਲੀ ਵੀ ਹੈ।
ਦਮੈਨੀ ਹੈਟਸ (The Many Hats)
ਇਹ ਕਲਾ-ਕ੍ਰਿਤ ਉਨ੍ਹਾਂ ਅਣਗਿਣਤ ਭੂਮਿਕਾਵਾਂ ਨੂੰ ਦਰਸਾਉਂਦੀ ਹੈ ਜੋ ਅਸੀਂ ਆਪਣੀ ਰੋਜ਼ਾਨਾ ਜ਼ਿੰਦਗੀ ਵਿੱਚ ਨਿਭਾਉਂਦੇ ਹਾਂ- ਦੇਖਭਾਲ ਕਰਨ ਵਾਲਾ, ਮੋਹਰੀ, ਕਲਾਕਾਰ, ਦੋਸਤ ਅਤੇ ਹੋਰ ਕਈ ਭੂਮਿਕਾਵਾਂ। ‘ਦ ਮੈਨੀ ਹੈਟਸ’ ਉਨ੍ਹਾਂ ਲੋਕਾਂ ਤੋਂ ਪ੍ਰੇਰਿਤ ਹੈ ਜੋ ਅਸਾਨੀ ਨਾਲ ਵੱਖ-ਵੱਖ ਜ਼ੁੰਮੇਵਾਰੀਆਂ ਨਿਭਾਉਂਦੇ ਹਨ। ਇਹ ਤਾਕਤ, ਬਹੁਪੱਖੀ ਹੋਣ ਅਤੇ ਆਪਣੇ ਆਪ ਦੇ ਹਰ ਪਹਿਲੂ ਨੂੰ ਅਪਣਾਉਣ ਦੀ ਸੁੰਦਰਤਾ ਨੂੰ ਦਰਸਾਉਂਦੀਹੈ।
ਡੌਰਕਸ ਦਾ ਹੋਰ ਕੰਮ ਦੇਖਣ ਲਈ, lynsowcreative.com ‘ਤੇ ਜਾਓ
ਆਇਲੀਨ ਫੌਂਗ (Eileen Fong)
ਆਇਲੀਨ ਫੌਂਗ, ਬਹੁ-ਸੱਭਿਆਚਾਰਕ ਪਿਛੋਕੜ ਵਾਲੇ ਇੱਕ ਬਹੁਪੱਖੀ ਕਲਾਕਾਰ ਹਨ, ਜਿਨ੍ਹਾਂ ਦਾ ਜਨਮ ਚੀਨ ਵਿੱਚ ਹੋਇਆ, ਜੋ ਹੌਂਗ ਕੌਂਗ ਵਿੱਚ ਵੱਡੇ ਹੋਏ, ਅਤੇ ਜੋ ਬਾਅਦ ਵਿੱਚ ਕੈਨੇਡਾ ਪਰਵਾਸ ਕਰ ਗਏ ਸਨ।
ਨਿਊਕਲੀਅਰ ਮੈਡੀਸਿਨ ਅਤੇ ਬਾਅਦ ਵਿੱਚ BCIT ਵਿੱਚ ਕੈਮਿਸਟਰੀ ਵਿੱਚ ਆਪਣੀ ਪੜ੍ਹਾਈ ਪੂਰੀ ਕਰਨ ਤੋਂ ਬਾਅਦ, ਆਇਲੀਨ ਨੇ ਸਿਹਤ ਦੇ ਖੇਤਰ ਵਿੱਚ ਆਪਣਾ ਕੈਰੀਅਰ ਸ਼ੁਰੂ ਕੀਤਾ। ਪਰ, ਜ਼ਿੰਦਗੀ ਦੇ ਨਵੇਂ ਪਹਿਲੂਆਂ ਦੀ ਪੜਚੋਲ ਕਰਨ ਅਤੇ ਆਪਣੀਆਂ ਜੜ੍ਹਾਂ ਨਾਲ ਦੁਬਾਰਾ ਜੁੜਨ ਦੀ ਉਨ੍ਹਾਂ ਦੀ ਇੱਛਾ ਨੇ ਉਨ੍ਹਾਂ ਨੂੰ ਚੀਨੀ ਬਰੱਸ਼ ਪੇਂਟਿੰਗ ਅਪਣਾਉਣ ਲਈ ਪ੍ਰੇਰਿਤ ਕੀਤਾ। ਕਈ ਮਹਾਨ ਚਿੱਤਰਕਾਰਾਂ ਦੀ ਅਗਵਾਈ ਹੇਠ, ਉਨ੍ਹਾਂ ਨੇ ਆਪਣੇ ਹੁਨਰ ਨੂੰ ਨਿਖਾਰਿਆ ਅਤੇ ਕੁਦਰਤੀ ਸੰਸਾਰ ਤੋਂ ਪ੍ਰੇਰਣਾ ਲਈ। ਆਇਲੀਨ ਨੇ ਬੀ.ਸੀ. ਭਰ ਵਿੱਚ ਪ੍ਰਦਰਸ਼ਨੀਆਂ ਵਿੱਚ ਇਕੱਲੇ ਆਪਣੇ ਕੰਮ ਦਾ ਪ੍ਰਦਰਸ਼ਨ ਕੀਤਾ ਹੈ।
ਡਾ. ਸਨ ਯਾਟ-ਸੇਨ ਗਾਰਡਨ ਵਿੱਚ ‘ਸੀਰੈਨਿਟੀ’ (Serenity in Dr. Sun Yat-Sen Garden)
ਇਹ ਵਾਟਰਕਲਰ ਨਾਲ ਰਾਈਸ ਪੇਪਰ ‘ਤੇ ਬਣਾਇਆ ਗਿਆ ਇੱਕ ਚਿੱਤਰ ਹੈ ਜੋ ਇੱਕ ਕਲਾਸੀਕਲ ਚੀਨੀ ਬਾਗ ਦੀ ਸ਼ਾਂਤੀ ਨੂੰ ਦਰਸਾਉਂਦੀ ਹੈ। ਕਲਾਸੀਕਲ ਚੀਨੀ ਬਾਗ ਦੇ ਡਿਜ਼ਾਈਨ ਦੇ ਚਾਰ ਪ੍ਰਮੁੱਖ ਤੱਤ ਹੁੰਦੇ ਹਨ: ਪਾਣੀ, ਪੱਥਰ, ਪੌਦੇ ਅਤੇ ਆਰਕੀਟੈਕਚਰ। ਇਨ੍ਹਾਂ ਨੂੰ ਸਦਭਾਵਨਾ ਪੈਦਾ ਕਰਨ ਲਈ ਸੰਤੁਲਿਤ ਕੀਤਾ ਜਾਂਦਾ ਹੈ। ਇਹ ਗਾਰਡਨ ਇੱਕ ਇਕਾਂਤ ਵਾਲੀ ਥਾਂ ਹੈ ਜਿੱਥੇ ਚਿੰਤਨ ਅਤੇ ਪ੍ਰੇਰਣਾ ਲਈ ਸ਼ਾਂਤੀ ਦਾ ਮਾਹੌਲ ਹੁੰਦਾ ਹੈ। ਡਾ. ਸੁਨ ਯਾਟ-ਸੇਨ ਕਲਾਸੀਕਲ ਚਾਈਨੀਜ਼ ਗਾਰਡਨ ਨੂੰ ਬਿਜਲੀ ਨਾਲ ਚੱਲਣ ਵਾਲੇ ਸੰਦਾਂ, ਪੇਚਾਂ ਜਾਂ ਕਿੱਲਾਂ ਤੋਂ ਬਿਨਾਂ, ‘ਸੂਝੋ’ (Suzhou) ਕਾਰੀਗਰਾਂ ਦੁਆਰਾ 15ਵੀਂ ਸਦੀ ਦੀਆਂ ਤਕਨੀਕਾਂ ਦੀ ਵਰਤੋਂ ਕਰਕੇ ਬਣਾਇਆ ਗਿਆ ਹੈ।
ਆਇਲੀਨ ਦਾ ਹੋਰ ਕੰਮ ਦੇਖਣ ਲਈ, eileenfong.com ‘ਤੇ ਜਾਓ
ਜੇਮੀ ਨੋਲ (Jamie Nole)
ਜੇਮੀ ਨੋਲ Tahltan Nation ਅਤੇ Nisga’a Nation of Ganada House – Frog crest ਤੋਂ ਇੱਕ ਨੌਰਥਵੈਸਟ ਕੋਸਟ ਕਲਾਕਾਰ ਹਨ। ਉਹ ਇਸ ਸਮੇਂ ਟੈਰੇਸ, ਬੀ.ਸੀ. ਵਿੱਚ ਰਹਿੰਦੇ ਹਨ। ਉਹ ‘ਵੁੱਡ ਸਕਲਪਚਰਜ਼’ (ਲੱਕੜ ਦੀਆਂ ਮੂਰਤੀਆਂ), ਚਿੱਤਰ , ਗ੍ਰਾਫਿਕਸ ਡਿਜ਼ਾਈਨ ਅਤੇ ਕਈ ਵਾਰ ਟੈਕਸਟਾਈਲ ਅਤੇ ਧਾਤ (metal) ਨਾਲ ਵਧੀਆ ਕਲਾ ਬਣਾਉਣ ਵਾਲੇ ਇੱਕ ਬਹੁ-ਪ੍ਰਤਿਭਾਵਾਨ ਕਲਾਕਾਰ ਹਨ। ਜੇਮੀ ਨੇ ‘ਕੋਸਟ ਮਾਊਂਟੇਨ ਕਾਲਜ’ (Coast Mountain College) ਵਿਖੇ ‘ਫ੍ਰੇਡਾ ਡਾਇਸਿੰਗ ਸਕੂਲ ਔਫ ਨੌਰਥਵੈਸਟ ਕੋਸਟ ਆਰਟ’ (Freda Diesing School of Northwest Coast art) ਵਿੱਚ ਪੜ੍ਹਾਈ ਕੀਤੀ। ਐਡਵਾਂਸਡ ਡਿਪਲੋਮਾ ਹਾਸਲ ਕਰਨ ਲਈ ਤਿੰਨ ਸਾਲ ਪੂਰੇ ਕਰਨ ਤੋਂ ਬਾਅਦ, ਉਹ ਸਾਲ 2016 ਤੋਂ ਇਸ ਈ-ਸ਼ਾਪ ਨੂੰ ਚਲਾ ਰਹੇ ਹਨ। ਬਹੁਤ ਸਾਰੇ ਬੱਚਿਆਂ ਦੀ ਰੁੱਝੀ ਹੋਈ ਮਾਂ ਹੋਣ ਦੇ ਬਾਵਜੂਦ, ਉਹ ਅਜੇ ਵੀ ਕਲਾ ਲਈ ਸਮਾਂ ਕੱਢਦੇ ਹਨ।
ਅਵੇਅਰਨੈਸ ਐਂਡ ਐਕਸੈਪਟੈਂਸ (Awareness and Acceptance)
ਜੇਮੀ ਨੂੰ ਆਪਣੇ ਉਨ੍ਹਾਂ ਤਿੰਨ ਬੱਚਿਆਂ ਤੋਂ ਰਚਨਾਤਮਕ ਪ੍ਰੇਰਣਾ ਮਿਲੀ ਜੋ ‘ਔਟਿਜ਼ਮ’ (autism) ਤੋਂ ਪੀੜਤ ਹਨ। ਡਿਜ਼ਾਈਨ ਵਿੱਚ ਜੋ ਆਕਾਰ ਅਤੇ ਤਸਵੀਰਾਂ ਤੁਸੀਂ ਦੇਖਦੇ ਹੋ ਉਹ ਇਹ ਦਰਸਾਉਂਦੇ ਹਨ ਕਿ ਔਟਿਜ਼ਮ ਵਾਲਾ ਦਿਮਾਗ ਇੱਕ ਸਧਾਰਨ ਦਿਮਾਗ ਤੋਂ ਕਿਵੇਂ ਵੱਖਰਾ ਹੁੰਦਾ ਹੈ। ਛਾਇਆ ਚਿੱਤਰ (silhouette) ਉਸਦੇ 4 ਸਾਲ ਦੇ ਬੱਚੇ ਦਾ ਹੈ, ਜਿਸ ਨੂੰ ਇੰਦਰਧਨੁਸ਼ ਨੂੰ ਰੰਗਣਾ ਪਸੰਦ ਹੈ। ਰੰਗਾਂ ਦੀ ਸ਼੍ਰੇਣੀ ਦਰਸਾਉਂਦੀ ਹੈ ਕਿ ਔਟਿਜ਼ਮ ਇੱਕ ਸਪੈਕਟ੍ਰਮ ਹੈ।
ਜੇਮੀ ਦਾ ਹੋਰ ਕੰਮ ਦੇਖਣ ਲਈ, jamienole.com ‘ਤੇ ਜਾਓ
ਜੇਮਜ਼ ਗ੍ਰੋਨਿੰਗ (James Groening)
ਜੇਮਜ਼ ਗ੍ਰੋਨਿੰਗ, ਜਾਂ ਬਲੂ ਸਕਾਈ, Kahkewistahaw Band, ਟਰਟਲ ਆਇਲੈਂਡ ਤੋਂ ਇੱਕ ਬਰਨਬੀ-ਅਧਾਰਤ ਕਰੀ (Cree) ਕਲਾਕਾਰ ਹਨ। ‘ਸਿਕਸਟੀਜ਼ ਸਕੂਪ’ ਦੌਰਾਨ ਆਪਣੇ ਗੋਰੇ ਦਾਦਾ-ਦਾਦੀ ਦੁਆਰਾ ਗੋਦ ਲਏ ਗਏ, ਜੇਮਜ਼ ਦਾ ਪਾਲਣ-ਪੋਸ਼ਣ ਪਲੇਨਜ਼ ਕਰੀ ਟੈਰੀਟੋਰੀ (Plains Cree Territory) ਵਿੱਚ ਇੱਕ ਖੇਤੀ-ਬਾੜੀ ਵਾਲੇ ਭਾਈਚਾਰੇ ਵਿੱਚ ਹੋਇਆ, ਜਿਸ ਨੂੰ ਮੈਨੀਟੋਬਾ ਵੀ ਕਿਹਾ ਜਾਂਦਾ ਹੈ। ਆਪਣੀ ਜਨਮ ਦੇਣ ਵਾਲੀ ਮਾਂ ਨੂੰ ਮਿਲਣ ਅਤੇ ਆਪਣੀ ਵਿਰਾਸਤ ਬਾਰੇ ਜਾਣਨ ਤੋਂ ਬਾਅਦ, ਉਨ੍ਹਾਂ ਨੇ ਕੋਸਟ ਸੇਲਿਸ਼ ਕਲਾ ਰੂਪਾਂ ਬਾਰੇ ਜਾਣਿਆ, ਜਿਨ੍ਹਾਂ ਨੇ ਉਨ੍ਹਾਂ ਨੂੰ ਆਪਣੀ ਇੰਡੀਜਨਸ ਪਛਾਣ ਨੂੰ ਮੁੜ-ਅਪਨਾਉਣ ਦੇ ਸਫ਼ਰ ਨੂੰ ਅੱਗੇ ਵਧਾਉਣ ਲਈ ਪ੍ਰੇਰਿਤ ਕੀਤਾ।
ਇੱਕ ਉੱਭਰ ਰਹੇ ਕਲਾਕਾਰ ਵਜੋਂ, ਜੇਮਜ਼ ਨੇ ਆਰਟਸ ਕਾਊਂਸਿਲ ਔਫ ਨਿਊ ਵੈਸਟਮਿੰਸਟਰ (Arts Council of New Westminster), Skwachàys ਲੌਜ ਐਬੋਰਿਜਨਲ ਹੋਟਲ ਅਤੇ ਗੈਲਰੀ (Lodge Aboriginal Hotel and Gallery) ਅਤੇ ਮੈਸੀ ਆਰਟਸ ਸੁਸਾਇਟੀ (Massey Arts Society) ਵਿੱਚ ਪ੍ਰਦਰਸ਼ਨੀ ਲਗਾਈ ਹੈ।
‘ਮੀ ਐਂਡ ਮਾਈਸੈਲਫ਼’ (Me and Myself)
ਆਪਣੀ ਜ਼ਿੰਦਗੀ ਦੇ ਸ਼ਾਂਤ ਪਲਾਂ ਵਿੱਚ, ਅਸੀਂ ਬਹੁਤ ਸਾਰੀਆਂ ਗਲਤੀਆਂ ਕਰਦੇ ਹਾਂ, ਪਰ ਅੱਗੇ ਵਧਣ ਲਈ ਸਾਨੂੰ ਆਪਣੇ ਆਪ ਨੂੰ ਸਵੀਕਾਰ ਕਰਨ ਦੀ ਜ਼ਰੂਰਤ ਹੁੰਦੀ ਹੈ; ਇਹ ਜਾਣਦੇ ਹੋਏ ਕਿ ਅਸੀਂ ਬਿਹਤਰ ਕਰ ਸਕਦੇ ਹਾਂ। ਤੁਸੀਂ ਜੋ ਦੇਖ ਰਹੇ ਹੋ ਉਹ ਇਹ ਹੈ ਕਿ ਜੇਮਜ਼ ਆਪਣੇ ਬਾਰੇ ਇੱਕ ‘ਸਿਕਸਟੀਜ਼ ਸਕੂਪ’ ਦੇ ਇੰਡੀਜਨਸ ਆਦਮੀ ਹੋਣ ਵਜੋਂ ਬਿਹਤਰ ਮਹਿਸੂਸ ਕਰ ਰਹੇ ਹਨ। ਰੰਗਾਂ ਵਿੱਚ ਬਹੁਤ ਸ਼ਕਤੀ ਹੁੰਦੀ ਹੈ ਅਤੇ ਇਨ੍ਹਾਂ ਨੂੰ ਸਾਂਝਾ ਕਰਨਾ ਸੰਸਾਰ ਦੇ ਜ਼ਖਮ ਭਰਨ ਵਿੱਚ ਮਦਦ ਕਰ ਸਕਦਾ ਹੈ।
ਜੇਮਜ਼ ਦਾ ਹੋਰ ਕੰਮ ਦੇਖਣ ਲਈ, blueskynativeart.square.site ‘ਤੇ ਜਾਓ
ਮਾਈਕ (Mike Alexander)
ਮਾਈਕ ਐਲੇਕਸੈਂਡਰ ਇੱਕ ਉੱਭਰ ਰਹੇ ‘ਅਨੀਸ਼ੀਨਾਬੇ’ (ਕੈਨੇਡਾ ਦੇ ਗ੍ਰੇਟ ਲੇਕਸ ਖੇਤਰ ਅਤੇ ਅਮਰੀਕਾ ਵਿੱਚ ਰਹਿਣ ਵਾਲੇ ਇੰਡੀਜਨਸ ਲੋਕਾਂ ਦਾ ਇੱਕ ਸਮੂਹ) ਵਿਯੂਅਲ ਆਰਟਿਸਟ ਅਤੇ ਲੇਖਕ ਹਨ ਜੋ ਟ੍ਰੀਟੀ #1 ਟੈਰੀਟੋਰੀ ਵਿੱਚ ‘ਸਵਾਨ ਲੇਕ’ (Swan Lake) ਫਰਸਟ ਨੇਸ਼ਨ ਤੋਂ ਹਨ ਅਤੇ ਇਸ ਸਮੇਂ ਵੈਨਕੂਵਰ, ਬੀ.ਸੀ. ਵਿੱਚ ਰਹਿ ਅਤੇ ਕੰਮ ਕਰ ਰਹੇ ਹਨ। ਜਨਮ ਤੋਂ ਥੋੜ੍ਹੀ ਦੇਰ ਬਾਅਦ ਇੱਕ ਗੈਰ-ਇੰਡੀਜਨਸ ਪਰਿਵਾਰ ਦੁਆਰਾ ਗੋਦ ਲਏ ਗਏ, ਮਾਈਕ ਇੱਕ ‘ਸਿਕਸਟੀਜ਼ ਸਕੂਪ* ਸਰਵਾਈਵਰ’ (Sixties Scoop survivor) ਹਨ ਅਤੇ ਦੂਜੀ-ਪੀੜ੍ਹੀ ਦੇ ਰੈਜ਼ਿਡੈਂਸ਼ੀਅਲ ਸਕੂਲ ਸਰਵਾਈਵਰ (ਰੈਜ਼ਿਡੈਂਸ਼ੀਅਲ ਸਕੂਲਾਂ ਤੋਂ ਬਚ ਕੇ ਨਿਕਲੇ ਲੋਕ) ਹਨ ਜੋ 2015 ਵਿੱਚ ਬੀ.ਸੀ. ਆਉਣ ਤੋਂ ਪਹਿਲਾਂ ਵਿਨੀਪੈਗ ਵਿੱਚ ਵੱਡੇ ਹੋਏ ਸਨ।
*‘ਸਿਕਸਟੀਜ਼ ਸਕੂਪ ਵਿੱਚ 1960 ਦੇ ਦਹਾਕੇ ਦੌਰਾਨ ਵੱਡੀ ਗਿਣਤੀ ਵਿੱਚ ਇੰਡੀਜਨਸ ਬੱਚਿਆਂ ਨੂੰ ਉਨ੍ਹਾਂ ਦੇ ਘਰਾਂ, ਭਾਈਚਾਰਿਆਂ ਅਤੇ ਜਨਮ ਦੇਣ ਵਾਲੇ ਪਰਿਵਾਰਾਂ ਤੋਂ ਖੋਹ ਕੇ ਕੈਨੇਡਾ ਅਤੇ ਅਮਰੀਕਾ ਦੇ ਗੈਰ-ਇੰਡੀਜਨਸ ਪਰਿਵਾਰਾਂ ਦੁਆਰਾ ਗੋਦ ਲਿਆ ਗਿਆ ਸੀ।
ਮਾਈਕ, ਕੈਮਲੂਪਸ ਆਰਟਸ ਕਾਊਂਸਿਲ (Kamloops Arts Council), ਫਰਸਟ ਪੀਪਲਜ਼ ਕਲਚਰਲ ਕਾਊਂਸਿਲ (First Peoples Cultural Council), ਬੀ ਸੀ ਆਰਟਸ ਕਾਊਂਸਿਲ (BC Arts Council) ਦੇ ਨਾਲ-ਨਾਲ ਕੈਨੇਡਾ ਕਾਊਂਸਿਲ ਫ਼ੌਰ ਆਰਟਸ (Canada Council for Arts) ਤੋਂ ਕਈ ਗ੍ਰਾਂਟਾਂ ਪ੍ਰਾਪਤ ਕਰ ਚੁੱਕੇ ਹਨ ਅਤੇ ਇਸ ਸਮੇਂ ਇੱਕ ਅਜਿਹੇ ਕਲਾਕਾਰ ਵਜੋਂ ਕੰਮ ਕਰ ਰਹੇ ਹਨ, ਜਿਨ੍ਹਾਂ ਦਾ ਕੰਮ ਦੁਨੀਆ ਭਰ ਵਿੱਚ ਸਰਾਹਿਆ ਜਾਂਦਾ ਹੈ। ਮਾਈਕ ਕਲਾ ਨੂੰ ਬਸਤੀਵਾਦ, ਇਲਾਜ ਅਤੇ ਸੱਭਿਆਚਾਰਕ ਪੁਨਰ-ਸੁਰਜੀਤੀ ਦੀ ਪ੍ਰਕਿਰਿਆ ਵਜੋਂ ਵਰਤਦੇ ਹੋਏ, ਆਪਣੇ ਸੱਭਿਆਚਾਰ ਦੇ ਚੱਲ ਰਹੇ ਪੁਨਰ ਨਿਰਮਾਣ ਨੂੰ ਮਾਨਤਾ ਦਿੰਦੇ ਹਨ।
ਸੰਬੰਧਤ ਜਾਣਕਾਰੀ (Continuum)
ਮਾਈਕ ਦਾ ਕੰਮ ਸੱਭਿਆਚਾਰ ਅਤੇ ਪਰਿਵਾਰ ਨਾਲ ਮੁੜ ਮਿਲਾਪ ਦੀ ਇੱਕ ਨਿਰੰਤਰ ਪ੍ਰਕਿਰਿਆ ਹੈ, ਅਤੇ ਚੰਗੇ ਤਰੀਕੇ ਨਾਲ ਜ਼ਿੰਦਗੀ ਜੀਉਣ ਲਈ ਉਨ੍ਹਾਂ ਦੇ ਜ਼ਖਮ ਭਰਨ ਦੇ ਸਫ਼ਰ ਨੂੰ ਮਾਨਤਾ ਦਿੰਦਾ ਹੈ। ਇਸ ਚਿੱਤਰ ਵਿੱਚ, ਮਾਈਕ ਲੋਕਾਂ ਵਿੱਚ ਔਖੇ ਸਮਿਆਂ ਤੋਂ ਬਾਅਦ ਨਜ਼ਰ ਆਉਂਦੀ ਮੁੜ ਉੱਭਰਨ ਦੀ ਸ਼ਕਤੀ ਬਾਰੇ ਅਤੇ ਉਸ ਉਮੀਦ ਬਾਰੇ ਗੱਲ ਕਰਨਾ ਚਾਹੁੰਦੇ ਸਨ ਜੋ ਉਹ ਆਪਣੇ ਆਪ ਵਿੱਚ ਮਹਿਸੂਸ ਕਰਦੇ ਹਨ, ਇਹ ਜਾਣਦੇ ਹੋਏ ਕਿ ਅਸੀਂ ਅਸਲ ਵਿੱਚ ਇਕੱਲੇ ਨਹੀਂ ਹਾਂ, ਅਤੇ ਇਹ ਕਿ ਦੁਬਾਰਾ ਇੱਕ-ਦੂਜੇ ਨਾਲ ਜੁੜਨਾ ਸੰਭਵ ਹੈ।
ਮਾਈਕ ਦਾ ਹੋਰ ਕੰਮ ਦੇਖਣ ਲਈ, thunderclouddesigns.org ‘ਤੇ ਜਾਓ
ਰੋਜ਼ੀਟਾ ਮੋਇਨੀ-ਸ਼ਿਰਾਜ਼ੀ (Rozita Moini-Shirazi)
ਰੋਜ਼ੀਟਾ ਮੋਇਨੀ-ਸ਼ਿਰਾਜ਼ੀ, ਇੱਕ ਈਰਾਨੀ-ਕੈਨੇਡੀਅਨ ਅੰਤਰ-ਅਨੁਸ਼ਾਸਨੀ ਕਲਾਕਾਰ ਹਨ, ਜੋ ਪੇਂਟਿੰਗ, ਚਿੱਤਰ, ਫੋਟੋਗ੍ਰਾਫੀ ਅਤੇ ‘ਇੰਸਟਾਲੇਸ਼ਨ’ ਰਾਹੀਂ ਸਮਕਾਲੀ ਸਮਾਜਿਕ-ਸੱਭਿਆਚਾਰਕ ਮੁੱਦਿਆਂ ਦੀ ਪੜਚੋਲ ਕਰਦੇ ਹਨ। 21 ਸਾਲ ਦੀ ਉਮਰ ਤੱਕ ਈਰਾਨ ਵਿੱਚ ਰਹਿਣ ਤੋਂ ਬਾਅਦ, ਉਨ੍ਹਾਂ ਨੇ ਈਰਾਨ-ਇਰਾਕ ਯੁੱਧ ਦਾ ਅਨੁਭਵ ਕੀਤਾ ਅਤੇ ਨਵੀਂ ਸਥਾਪਤ ਇਸਲਾਮੀ ਸਰਕਾਰ ਦੁਆਰਾ ਆਪਣੇ ਅਜ਼ੀਜ਼ਾਂ ਨੂੰ ਕੈਦ ਹੁੰਦੇ ਜਾਂ ਮੌਤ ਦੀ ਸਜ਼ਾ ਮਿਲਦਿਆਂ ਦੇਖਿਆ। ਉਨ੍ਹਾਂ ਨੇ ਅਨਿਆਂ ਨੂੰ ਖਤਮ ਕਰਨ, ਏਕਤਾ, ਸਮਾਨਤਾ ਅਤੇ ਪਿਆਰ ਨੂੰ ਉਤਸ਼ਾਹਤ ਕਰਨ ਲਈ ਕਲਾ ਦੀ ਵਰਤੋਂ ਕਰਨ ਦੀ ਵਚਨਬੱਧਤਾ ਕੀਤੀ।
ਸਾਲ 1984 ਵਿੱਚ ਜਰਮਨੀ ਅਤੇ 1990 ਵਿੱਚ ਕੈਨੇਡਾ ਪਰਵਾਸ ਕਰਨ ਤੋਂ ਬਾਅਦ, ਉਨ੍ਹਾਂ ਨੇ ਕਮਿਊਨੀਕੇਸ਼ਨ ਡਿਜ਼ਾਈਨ ਦੀ ਪੜ੍ਹਾਈ ਕੀਤੀ ਅਤੇ ‘ਐਮਿਲੀ ਕਾਰ ਯੂਨੀਵਰਸਿਟੀ’ (Emily Carr University) ਤੋਂ BFA, ‘ਤਹਿਰਾਨ ਆਜ਼ਾਦ ਯੂਨੀਵਰਸਿਟੀ’ (Tehran Azad University) ਤੋਂ MFA ਅਤੇ ‘ਯੂਨੀਵਰਸਿਟੀ ਔਫ ਵਿਕਟੋਰੀਆ’ (University of Victoria) ਤੋਂ M.Ed. ਹਾਸਲ ਕੀਤੀ। ਉਹ ਰਿਚਮੰਡ, ਬੀ.ਸੀ. ਵਿੱਚ ਸਥਿਤ ਹਨ, ਅਤੇ ਇਸ ਸਮੇਂ ਐਮਿਲੀ ਕਾਰ ਵਿਖੇ ਪੜ੍ਹਾਉਂਦੇ ਹਨ ਅਤੇ ਪ੍ਰਾਈਵੇਟ ਅਤੇ ਪਬਲਿਕ ਕੋਲੈਕਸ਼ਨਾਂ ਵਿੱਚ ਆਪਣੇ ਕੰਮ ਨੂੰ ਵਿਆਪਕ ਤੌਰ ‘ਤੇ ਪ੍ਰਦਰਸ਼ਿਤ ਕਰਦੇ ਹਨ।
ਇਕੱਠ (Togetherness)
ਇਹ ਪੇਂਟਿੰਗ ਏਕਤਾ, ਮਜ਼ਬੂਤੀ ਅਤੇ ਵਿਭਿੰਨਤਾ ਦੀ ਤਾਕਤ ਦੀ ਪੜਚੋਲ ਕਰਦੀ ਹੈ। ਵੱਖਰੇ ਪਰ ਆਪਸ ਵਿੱਚ ਜੁੜੇ ਹੋਏ ਚਿੱਤਰ ਇੱਕ ਅਜਿਹੀ ਦੁਨੀਆ ਦਾ ਪ੍ਰਤੀਕ ਹਨ ਜਿੱਥੇ ਮਤਭੇਦ, ਵਿਤਕਰਾ ਕਰਨ ਦੀ ਬਜਾਏ ਲੋਕਾਂ ਨੂੰ ਆਪਸ ਵਿੱਚ ਮਜ਼ਬੂਤੀ ਨਾਲ ਜੋੜਦੇ ਹਨ। ਲਾਲ ਰੰਗ ਦੇ ਸੱਪ ਦੁਆਰਾ ਦਰਸਾਈਆਂ ਚੁਣੌਤੀਆਂ ਦੇ ਵਿਚਕਾਰ, ਸਿਆਣਪ ਅਤੇ ਸਮਝ ਦੁਆਰਾ ਸਦਭਾਵਨਾ ਕਾਇਮ ਹੁੰਦੀ ਹੈ। ਇਹ ਆਪਣੇਪਣ, ਸਹਿ-ਹੋਂਦ ਅਤੇ ਭਾਈਚਾਰੇ ਦੀ ਸਥਾਈ ਤਾਕਤ ਨੂੰ ਦਰਸਾਉਂਦੀ ਹੈ।
ਰੋਜ਼ੀਟਾ ਦਾ ਹੋਰ ਕੰਮ ਦੇਖਣ ਲਈ, rozitamoinishirazi.com ‘ਤੇ ਜਾਓ
