ਇਸ ਖੋਜ ਲਈ, ‘ਬੀ ਸੀ ਸਟੈਟਸ’ (BC Stats) ਨੇ ‘ਸਟੈਟਿਸਟਿਕਸ ਕੈਨੇਡਾ’ (Statistics Canada) ਤੋਂ ਸਾਲ 2020 ਦੇ ਟੈਕਸ ਡਾਟਾ ਨਾਲ ਜੁੜੇ ਸਾਲ 2021 ਦੀ ਮਰਦਮਸ਼ੁਮਾਰੀ ਦੇ ਅੰਕੜਿਆਂ ਦੀ ਵਰਤੋਂ ਕੀਤੀ। ਹਾਲਾਂਕਿ ਕੋਵਿਡ-19 ਨੇ ਸਾਲ 2020 ਵਿੱਚ ਕਾਰਜਬਲ ਨੂੰ ਪ੍ਰਭਾਵਤ ਕੀਤਾ ਸੀ, ਪਰ ਬੀ.ਸੀ. ਵਿੱਚ ਕਰਮਚਾਰੀਆਂ ਦੀ ਕਮਾਈ ‘ਤੇ ਉਨ੍ਹਾਂ ਦੀ ਪਛਾਣ ਦੇ ਵੱਖ-ਵੱਖ ਪਹਿਲੂਆਂ ਦੇ ਪ੍ਰਭਾਵਾਂ ਸੰਬੰਧੀ ਖੋਜ ਨੂੰ ਸਹਿਯੋਗ ਦੇਣ ਲਈ ਉਪਲਬਧ ਇਹ ਸਭ ਤੋਂ ਤਾਜ਼ਾ ਅੰਕੜੇ ਸਨ।

ਟੀਮ ਨੇ 26 ਕਿੱਤਿਆਂ ਦੇ ਲਗਭਗ 25,000 ਲੋਕਾਂ ਦੀ ਤਨਖਾਹ ਦਾ ਵਿਸ਼ਲੇਸ਼ਣ ਕੀਤਾ। ਇਸ ਨਾਲ ਇਹ ਦਰਸਾਉਣ ਵਿੱਚ ਮਦਦ ਮਿਲੀ ਕਿ ਬੀ.ਸੀ. ਵਿੱਚ ਨਸਲੀ ਪਿਛੋਕੜ ਵਾਲੇ ਅਤੇ ਗੋਰੇ ਕਾਮਿਆਂ ਵਿਚਕਾਰ ਤਨਖਾਹ ਵਿੱਚ ਕਿੱਥੇ-ਕਿੱਥੇ ਅੰਤਰ ਸਨ। ਇਸ ਕੰਮ ਨੂੰ ਕਰਨ ਲਈ, ਟੀਮ ਨੇ ਪਛਾਣ ਨਾਲ ਸੰਬੰਧਤ ਤੱਤਾਂ ਦੀ ਪੜਚੋਲ ਕੀਤੀ, ਜਿਵੇਂ ਕਿ:

• ਨਸਲ
• ਉਮਰ
• ਸਿੱਖਿਆ
• ਜੇ ਤੁਸੀਂ ਕੈਨੇਡਾ ਤੋਂ ਬਾਹਰ ਪੈਦਾ ਹੋਏ ਸੀ

ਇਸ ਜਾਣਕਾਰੀ ਦੇ ਨਾਲ, ਖੋਜਕਰਤਾ ਇਹ ਪਛਾਣ ਸਕੇ ਕਿ ਨਸਲੀ ਪਿਛੋਕੜ ਵਾਲੇ ਲੋਕਾਂ ਨੂੰ ਵਾਜਬ ਤਨਖਾਹ ਪ੍ਰਾਪਤ ਕਰਨ ਲਈ ਵਧੇਰੇ ਰੁਕਾਵਟਾਂ ਦਾ ਸਾਹਮਣਾ ਕਿੱਥੇ ਕਰਨਾ ਪੈ ਸਕਦਾ ਹੈ। ਕੈਨੇਡਾ ਸਰਕਾਰ ਦੇ ‘ਰਾਸ਼ਟਰੀ ਪੇਸ਼ੇਵਰ ਵਰਗੀਕਰਨ’ (National Occupation Classification) ਵਿੱਚ ਪ੍ਰਮੁੱਖ ਕਿੱਤਿਆਂ ਦੇ 45 ਗਰੁੱਪ ਹਨ। ‘ਸਟੈਟਿਸਟਿਕਸ ਕੈਨੇਡਾ’ ਨੇ ਇਨ੍ਹਾਂ ਵਿੱਚੋਂ ਕੁਝ ਗਰੁੱਪਾਂ ਨੂੰ ਸਾਲ 2021 ਦੀ ਮਰਦਮਸ਼ੁਮਾਰੀ ਦੇ ਅੰਕੜਿਆਂ ਵਿੱਚ ਮਿਲਾ ਕੇ ਉਹ 26 ਕਿੱਤੇ ਤਿਆਰ ਕੀਤੇ ਜੋ ‘ਬੀ ਸੀ ਸਟੈਟਸ’ ਨੇ ਇਸ ਖੋਜ ਲਈ ਵਰਤੇ ਸਨ।

ਕਿੱਤਿਆਂ ਦੇ ਇਹ ਗਰੁੱਪ ਵਿਆਪਕ ਹਨ ਅਤੇ ਵੱਖ-ਵੱਖ ਭੂਮਿਕਾਵਾਂ ਵਿੱਚ ਕੰਮ ਕਰਨ ਵਾਲੇ ਕਾਮਿਆਂ ਨੂੰ ਸ਼ਾਮਲ ਕਰਦੇ ਹਨ। ਉਦਾਹਰਨ ਲਈ, ‘ਰੀਟੇਲ ਅਤੇ ਸਰਵਿਸ ਸੁਪਰਵਾਈਜ਼ਰ’ ਗਰੁੱਪ ਵਿੱਚ ਰੀਟੇਲ ਅਤੇ ਥੋਕ ਦੇ ਖ਼ਰੀਦਦਾਰ, ਫੂਡ ਸਰਵਿਸ ਸੁਪਰਵਾਈਜ਼ਰ, ਸ਼ੈੱਫ, ਫਿਊਨਰਲ ਡਾਇਰੈਕਟਰ ਅਤੇ ਇਕਜ਼ੈਕਿਟਿਵ ਹਾਊਸਕੀਪਰ ਸ਼ਾਮਲ ਹਨ। ‘ਰਾਸ਼ਟਰੀ ਪੇਸ਼ੇਵਰ ਵਰਗੀਕਰਨ ਮੈਟ੍ਰਿਕਸ’ (National Occupational Classification matrix) ‘ਤੇ ਉਨ੍ਹਾਂ ਗਰੁੱਪਾਂ ਦੇ ਵਿੱਚ ਸ਼ਾਮਲ ਕਿੱਤਿਆਂ ਅਤੇ ਨੌਕਰੀਆਂ ਬਾਰੇ ਹੋਰ ਜਾਣੋ।

ਖੋਜ ਟੀਮ ਨੇ ‘ਇੰਡੀਜਨਸ’ (ਮੂਲ ਨਿਵਾਸੀ) ਲੋਕਾਂ ਬਾਰੇ ਡਾਟਾ ਦਾ ਵਿਸ਼ਲੇਸ਼ਣ ਜਾਂ ਰਿਪੋਰਟਿੰਗ ਕਰਨ ਤੋਂ ਪਹਿਲਾਂ ਉਨ੍ਹਾਂ ਨਾਲ ਸ਼ਮੂਲੀਅਤ ਲਈ ਹੋਰ ਸਮਾਂ ਦੇਣ ਲਈ, ਸੈਂਪਲ ਵਿੱਚ ਇੰਡੀਜਨਸ ਕਰਮਚਾਰੀਆਂ ਨੂੰ ਸ਼ਾਮਲ ਨਹੀਂ ਕੀਤਾ। ਮੌਜੂਦਾ ਖੋਜ ਦੱਸਦੀ ਹੈ ਕਿ ਇੰਡੀਜਨਸ ਲੋਕਾਂ ਦੀ ਔਸਤ ਆਮਦਨ ਗੈਰ-ਇੰਡੀਜਨਸ ਲੋਕਾਂ ਨਾਲੋਂ ਘੱਟ ਹੈ। ਟੀਮ ਇਹ ਸਮਝਣ ਲਈ ਕੰਮ ਕਰ ਰਹੀ ਹੈ ਕਿ ਹੋਰ ਕਿਹੜੇ ਖੇਤਰ ਇੰਡੀਜਨਸ ਭਾਈਚਾਰੇ ਲਈ ਮਹੱਤਵਪੂਰਨ ਹਨ, ਤਾਂ ਜੋ ਭਵਿੱਖ ਦੀ ਖੋਜ ਦੇ ਅਗਲੇ ਪੜਾਅ ਵਿੱਚ ਉਨ੍ਹਾਂ ਦੀ ਹੋਰ ਜਾਂਚ ਕੀਤੀ ਜਾ ਸਕੇ।