Pag-unawa sa pag-usad ng propesyonal na karera ng mga Indigenous at racialized na empleyado sa BC Public Service

May 29, 2026

Basahin ang buong ulat (PDF)

Pananaliksik

Naipakita ng nakaraang pananaliksik na kulang sa representasyon ang mga Indigenous at racialized na komunidad sa BC Public Service, lalo na sa antas ng management at executive.

Sinusuri ng ulat na ito ang pag-usad ng propesyonal na karera ng mga Indigenous at racialized na empleyado sa BC Public Service sa loob ng tatlong panahon ng pag-uulat (2020, 2022 at 2024) upang maunawaan kung paano nagbago ang representasyon.

Gamit ang datos mula sa dalawang survey para sa mga empleyado (Work Environment Survey at New Job Survey), sinuri rin ng research team ang mga full-time at temporary na posisyon (tinatawag ding auxiliary) at isinasaalang-alang ang:

  • Mga empleyado na pumapasok sa BC Public Service
  • Mga promosyon sa buong organisasyon
  • Mga empleyado na umaalis sa BC Public Service

Sa pamamagitan ng pagsuri sa pag-usad ng propesyonal na karera, mas mauunawaan ng BC Public Service Agency (PSA) ang ilan sa mga salik na nakakaapekto sa katarungang panlahi at diversity ng mga empleyado sa BC Public Service habang lumilipas ang panahon.

Nakaayon ang proyektong ito sa priyoridad sa pananaliksik ukol sa anti-racism na nakapokus sa katarungang panlahi o racial equity sa BC Public Service. Ipinagpapatuloy nito ang pananaliksik mula 2024 at 2025, kung saan binigyang-diin ang kakulangan ng representasyon ng mga mamamayang Indigenous at racialized sa BC Public Service.

Mga natuklasan

Para sa pananaliksik na ito, sinuri ng team ang datos para sa mga empleyado na boluntaryong ibinahagi ang impormasyon tungkol sa kanilang identidad upang matukoy ang porsiyento ng mga nag-identify bilang Indigenous o racialized para sa bawat panahon ng pag-uulat. Ang pamamaraang ito ay nagpapakita ng mas tumpak na impormasyon tungkol sa mga pagbabago sa representasyon kaysa sa pagsasama ng impormasyon ng mga empleyadong hindi pinili na ibahagi ang kanilang identidad para sa pananaliksik.

Naipakita ng nakaraang pananaliksik na kulang sa representasyon sa BC Public Service ang mga Indigenous at racialized na empleyado dahil sa mga sistemikong hadlang sa loob ng organisasyon. Ipinapakita ng pagsusuring ito kung paano nagbago sa paglipas ng panahon ang representasyon sa pagtanggap, promosyon at pag-alis ng mga empleyado, kung saan ipinapahayag nito ang mga trend para sa mga Indigenous at racialized na empleyado.

Habang binibigyang-diin ng pananaliksik na ito ang mga trend o pagbabago sa pag-usad sa propesyonal na karera sa organisasyon, hindi nito ipinapaliwanag kung ano ang dahilan nito. Hindi rin kinukumpirma ng pananaliksik na ito ang progreso tungkol sa isang mas makatarungang workforce dahil kasalukuyan pa ring mayroong mga hadlang kahit na tila tumataas na ang representasyon.

Mga Indigenous na empleyado

Para sa mga Indigenous na empleyado, natuklasan ng research team ang:

  • Pagbaba sa porsiyento ng mga empleyado na tinanggap mula sa labas ng organisasyon (4.7 porsiyento mula 5.8 porsiyento). Walang malaking naipakitang pagbabago para sa mga naging permanente mula sa mga pansamantalang posisyon
  • Pagtaas sa porsiyento ng mga empleyadong na-promote sa pamamagitan ng isang competitive hiring process para sa isang posisyon sa ibang ministry (4.8 porsiyento mula 3.4 porsiyento), subalit walang malaking pagbabago para sa mga indibidwal na na-promote sa kanilang kasalukuyang ministry
  • Nanatiling wala gaanong pagbabago ang porsiyento ng mga Indigenous na empleyadong umaalis sa organisasyon sa mga panahon ng pag-uulat (6.4 porsiyento noong 2020, 5.9 porsiyento noong 2022 at 5.8 porsiyento noong 2024)

Ipinapakita ng mga natuklasang ito na patuloy na mayroong mga sistemikong balakid para sa mga Indigenous people na pumapasok o nagiging permanenteng empleyado sa BC Public Service. Kailangan pa ng mas malawak na pananaliksik para maunawaan ang mga pattern na ito, kabilang kung paano nakakaapekto ang proseso ng pag-hire, cultural safety (pagiging angkop sa kultura) at iba pang sistemikong salik sa pagkakaroon ng makatarungang access sa trabaho para sa mga Indigenous na komunidad.

Mga Indigenous na empleyado na tinanggap sa trabaho mula sa labas ng BC Public Service mula 2020 hanggang 2024

Mga Indigenous na empleyado na na-promote sa ibang ministry mula 2020 hanggang 2024

Mga Indigenous na empleyado na umalis ng BC Public Service mula 2020 hanggang 2024

Ginagamit ng pagsusuring ito ang datos mula sa mga bagong tanggap na empleyado na boluntaryong ibinahagi ang impormasyon tungkol sa kanilang identidad.

Ginagamit ng pagsusuring ito ang impormasyon tungkol sa identidad na boluntaryong ibinahagi ng mga empleyado na na-promote sa bagong posisyon sa ibang ministry sa pamamagitan ng isang competitive hiring process.

Ginagamit ng pagsusuring ito ang impormasyon tungkol sa identidad na boluntaryong ibinahagi ng mga empleyadong umalis sa BC Public Service.

Mga racialized na empleyado

Para sa mga racialized na empleyado, natuklasan ng research team ang:

  • Parehong pagtaas ng porsiyento ng mga external hire (36.2 porsiyento mula 26.8 porsiyento) at mga naging permanente mula pansamantalang posisyon (30.1 porsiyento mula 24 porsiyento)
  • Parehong pagtaas ng porsiyento ng mga empleyado sa iba’t ibang bahagi ng organisasyon na na-promote sa pamamagitan ng isang competitive hiring process, para sa mga na-promote sa parehong ministry (22.5 porsiyento mula 18.8 porsiyento) at mga lumipat sa ibang ministry (28 porsiyento mula 23.8 porsiyento)
  • Pagtaas ng porsiyento ng mga empleyadong umalis sa organisasyon (22.7 porsiyento mula 20.4 porsiyento)

Kahit na ipinapakita ng mga natuklasang ito ang mga pagtaas sa pagtanggap sa trabaho at pagkakaroon ng mga promosyon sa iba’t ibang panahon ng pag-uulat, kailangan pa rin ng mas malawak na pananaliksik upang maunawaan kung paano nakakaapekto sa retention (pagpapanatili ng empleyado sa trabaho) at advancement para sa mga racialized na empleyado ang mga karanasan sa lugar ng trabaho, mga oportunidad sa pag-unlad sa propesyonal na karera at mga sistemikong kondisyon.

Mga racialized na empleyadong tinanggap mula sa labas ng BC Public Service mula 2020 hanggang 2024

Mga racialized na empleyadong naging permanente mula pansamantalang posisyon mula 2020 hanggang 2024

Mga racialized na empleyadong umalis ng BC Public Service mula 2020 hanggang 2024

Ginagamit ng pagsusuring ito ang datos mula sa mga bagong tanggap na empleyado na boluntaryong ibinahagi ang impormasyon tungkol sa kanilang identidad.

Ginagamit ng pagsusuring ito ang impormasyon tungkol sa identidad na boluntaryong ibinahagi ng mga naging permanenteng empleyadong na lumipat mula sa isang temporary (auxiliary) na posisyon sa BC Public Service.

Ginagamit ng pagsusuring ito ang impormasyon tungkol sa identidad na boluntaryong ibinahagi ng mga empleyado na umalis sa BC Public Service.

Mga limitasyon ng datos

Isinasaalang-alang ng pagsusuri ang mga empleyado na ibinahagi ang impormasyon tungkol sa kanilang identidad at sinusuri ang ilang partikular na posisyon o uri ng pag-usad sa propesyonal na karera. Hindi kasama dito ang mga empleyadong piniling hindi magbigay ng impormasyon tungkol sa kanilang identidad o ang mga lumipat sa temporary assignment o sa kapantay (lateral) na posisyon sa organisasyon.

Ang pananaliksik ay hindi naghahatid ng isang pagsusuri na disaggregated (pinaghiwa-hiwalay) o batay sa iba-iba at natatanging katangian (distinctions-based) dahil ang datos na ginamit ng team ay ginugrupo lamang ang mga empleyado bilang Indigenous o racialized. Nagiging pagsubok ito sa pag-unawa kung paano naaapektuhan ang mga demograpikong grupo ng mga sistemikong hadlang sa BC Public Service.

Mga susunod na hakbang

Upang matugunan ang mga natuklasang ito, magpopokus ang PSA sa pagpapatuloy ng pananaliksik at pagpapatatag ng mga sistemang nakaaapekto sa mga karanasan sa BC Public Service. Kabilang sa mga susunod na pagsisikap ang:

  • Pagpapatuloy ng pananaliksik, kabilang ang pagsasagawa ng qualitative na pamamaraan at pagsasagawa ng isang pamamaraan na mas detalyado at batay sa iba-iba at natatanging katangian (distinctions-based) upang mapahusay ang pag-unawa kung saan nakararanas ng mga hadlang ang mga Indigenous at racialized na empleyado
  • Pagsusuri ng kasanayan sa pagpapaunlad ng propesyonal na karera at retention (pagpapanatili ng empleyado sa trabaho) at pagbuo ng mga simpleng tools upang makatulong sa pagsubaybay kung saan kailangan ng mga pagbabago
  • Pagsuporta sa kasalukuyang pagsisikap ng pamahalaan upang pare-pareho ang pagsasagawa ng mga kasanayan na nakapokus sa equity o pagkamakatarungan

Bibigyang priyoridad ng pananaliksik sa hinaharap ang paggamit ng mga datos na batay sa lahi at batay sa iba-iba at natatanging katangian upang suriin kung paano naaapektuhan ng mga sistemikong hadlang sa organisasyon ang mga espesipikong grupo ng mga empleyado. Kabilang sa engagement na ito ang pagbibigay ng isang mas detalyadong impormasyon tungkol sa karanasan ng mga Indigenous at racialized na empleyadong nagtatrabaho sa pamahalaan.

Karagdagang Impormasyon

Para sa karagdagang impormasyon tungkol sa proyekto at mga natuklasan dito, basahin ang ulat ng pananaliksik.

Mga kaugnay na link