ਬੀ ਸੀ ਪਬਲਿਕ ਸਰਵਿਸ ਵਿੱਚ ਵਧੇਰੇ ਵਿਭਿੰਨਤਾ ਲਿਆਉਣਾ
30 ਮਈ 2025
ਬ੍ਰਿਟਿਸ਼ ਕੋਲੰਬੀਆ ਬਹੁਤ ਸਾਰੇ ਵਿਭਿੰਨ ਭਾਈਚਾਰਿਆਂ ਦਾ ਘਰ ਹੈ, ਪਰ ਲੰਮੇ ਸਮੇਂ ਤੋਂ ਚੱਲਦੀਆਂ ਆ ਰਹੀਆਂ ਪ੍ਰਣਾਲੀਆਂ ਅਤੇ ਢਾਂਚੇ, ਨਸਲਵਾਦੀ ਨੀਤੀਆਂ ਅਤੇ ਰੁਕਾਵਟਾਂ ਦਾ ਮਤਲਬ ਹੈ ਕਿ ਬੀ.ਸੀ. ਦੀ ਅਬਾਦੀ ਦੀ ਤੁਲਨਾ ਵਿੱਚ, ਬੀ ਸੀ ਪਬਲਿਕ ਸਰਵਿਸ ਵਿੱਚ ਇੰਡੀਜਨਸ ਅਤੇ ਨਸਲੀ ਪਿਛੋਕੜ ਵਾਲੇ ਲੋਕਾਂ ਦੀ ਨੁਮਾਇੰਦਗੀ ਘੱਟ ਹੈ। ਇਹ ਘਾਟ ਮੈਨੇਜਮੈਂਟ ਅਤੇ ਪ੍ਰਬੰਧਕੀ ਅਹੁਦਿਆਂ ‘ਤੇ ਹੋਰ ਵੀ ਵੱਧ ਹੋ ਜਾਂਦੀ ਹੈ।
ਸਰਕਾਰੀ ਸੇਵਾਵਾਂ ਵਿੱਚ ਪ੍ਰਣਾਲੀਗਤ ਨਸਲਵਾਦ ਨੂੰ ਹੱਲ ਕਰਨ ਲਈ, ਬੀ ਸੀ ਪਬਲਿਕ ਸਰਵਿਸ ਵਿੱਚ ਉਹਨਾਂ ਵਿਭਿੰਨ ਭਾਈਚਾਰਿਆਂ ਦੀ ਬਿਹਤਰ ਨੁਮਾਇੰਦਗੀ ਹੋਣੀ ਚਾਹੀਦੀ ਹੈ, ਜਿਨ੍ਹਾਂ ਦੀ ਅਸੀਂ ਸੇਵਾ ਕਰਦੇ ਹਾਂ।
ਅਸੀਂ ਸੂਬੇ ਵਿੱਚ ਹਰ ਕਿਸੇ ਲਈ ਕੰਮ ਕਰਨ ਵਾਲੀਆਂ ਸੇਵਾਵਾਂ ਨੂੰ ਉਦੋਂ ਬਿਹਤਰ ਢੰਗ ਨਾਲ ਤਿਆਰ ਕਰਕੇ ਲੋਕਾਂ ਲਈ ਉਪਲਬਧ ਕਰਵਾ ਸਕਦੇ ਹਾਂ, ਜਦੋਂ ਸਰਕਾਰੀ ਨੀਤੀਆਂ ਅਤੇ ਪ੍ਰੋਗਰਾਮਾਂ ਵਿੱਚ ਵੱਖ-ਵੱਖ ਮੁਹਾਰਤ ਵਾਲੇ ਲੋਕਾਂ ਦੇ ਅਸਲ ਤਜਰਬੇ ਅਤੇ ਨਜ਼ਰੀਏ ਸ਼ਾਮਲ ਕੀਤੇ ਜਾਣਗੇ।
The research
ਸਾਲ 2023 ਵਿੱਚ, ਸੂਬੇ ਨੇ ਨਸਲਵਾਦ-ਵਿਰੋਧੀ ਡਾਟਾ ਕਮੇਟੀ ਅਤੇ ਇੰਡੀਜਨਸ ਲੋਕਾਂ ਦੇ ਸਹਿਯੋਗ ਨਾਲ 10 ਨਸਲਵਾਦ-ਵਿਰੋਧੀ ਖੋਜ ਤਰਜੀਹਾਂ ਦੀ ਪਛਾਣ ਕੀਤੀ। ਇਹ ਖੋਜ ਬੀ ਸੀ ਪਬਲਿਕ ਸਰਵਿਸ ਵਿੱਚ ਨਸਲੀ ਵਿਭਿੰਨਤਾ ਅਤੇ ਸਮਾਨਤਾ ਨਾਲ ਸਸੰਬੰਧਤ ਤਰਜੀਹ ਦੇ ਅਧੀਨ ਆਉਂਦੀ ਹੈ।
ਇਸ ਕੰਮ ਵਿੱਚ ਸਹਿਯੋਗ ਦੇਣ ਲਈ, ਇੱਕ ਖੋਜ ਟੀਮ ਨੇ ਸੰਸਥਾ ਵਿੱਚ ਨੁਮਾਇੰਦਗੀ ਦੇ ਮੌਜੂਦਾ ਪੱਧਰਾਂ ਨੂੰ ਸਮਝਣ ਲਈ ਬੀ ਸੀ ਪਬਲਿਕ ਸਰਵਿਸ ਵਿੱਚ ਵਿਭਿੰਨਤਾ ਦੀ ਪੜਚੋਲ ਕੀਤੀ ਅਤੇ ਦੇਖਿਆ ਕਿ ਇੰਡੀਜਨਸ ਅਤੇ ਨਸਲੀ ਪਿਛੋਕੜ ਵਾਲੇ ਭਾਈਚਾਰਿਆਂ ਨੂੰ ਉੱਚ ਅਹੁਦਿਆਂ ਤੱਕ ਪਹੁੰਚ ਕਰਨ ਵਿੱਚ ਕਿੱਥੇ ਰੁਕਾਵਟਾਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਇਹਨਾਂ ਰੁਕਾਵਟਾਂ ਨੂੰ ਹੱਲ ਕਰਨ ਨਾਲ ਬੀ ਸੀ ਪਬਲਿਕ ਸਰਵਿਸ ਨੂੰ ਬੀ.ਸੀ. ਦੀ ਅਬਾਦੀ ਨੂੰ ਬਿਹਤਰ ਢੰਗ ਨਾਲ ਦਰਸਾਉਣ ਵਿੱਚ ਮਦਦ ਮਿਲਦੀ ਹੈ, ਖ਼ਾਸਕਰ ਉਨ੍ਹਾਂ ਅਹੁਦਿਆਂ ਲਈ ਜੋ ਨੀਤੀਆਂ ਅਤੇ ਪ੍ਰੋਗਰਾਮਾਂ ਦੀ ਅਗਵਾਈ ਕਰਦੇ ਹਨ ਅਤੇ ਉਨ੍ਹਾਂ ਬਾਰੇ ਫੈਸਲੇ ਲੈਂਦੇ ਹਨ।
ਮਈ 2024 ਵਿੱਚ, ਸੂਬੇ ਨੇ ਬੀ ਸੀ ਪਬਲਿਕ ਸਰਵਿਸ ਵਿੱਚ ਪ੍ਰਤੀਨਿੱਧਤਾ ਬਾਰੇ ਨਤੀਜੇ ਜਾਰੀ ਕੀਤੇ। ਇਹ ਜਾਣਕਾਰੀ 2022 ਵਿੱਚ ਇਕੱਠੇ ਕੀਤੇ ਕਰਮਚਾਰੀ ਸਰਵੇਖਣਾਂ ਅਤੇ ਮਨੁੱਖੀ ਸਰੋਤ ਡਾਟਾ ‘ਤੇ ਅਧਾਰਤ ਸੀ।
ਅਸੀਂ 2024 ਦੇ ਸਰਵੇਖਣਾਂ ਦੀ ਵਰਤੋਂ ਕਰਕੇ ਆਪਣੇ ਨਤੀਜੇ ਤਬਦੀਲ ਕੀਤੇ ਹਨ। ਬੀ ਸੀ ਪਬਲਿਕ ਸਰਵਿਸ ਏਜੰਸੀ ਦੇ ਖੋਜਕਾਰੀਆਂ ਨੇ ਬੀ ਸੀ ਪਬਲਿਕ ਸਰਵਿਸ ਵਿੱਚ ਵੱਖ-ਵੱਖ ਭੂਮਕਿਾਵਾਂ ਵਿੱਚ ਪ੍ਰਤੀਨਿੱਧਤਾ ਨੂੰ ਸਮਝਣ ਲਈ ਇੰਡੀਜਨਸ ਅਤੇ ਨਸਲੀ ਪਿਛੋਕੜ ਵਾਲੇ ਕਰਮਚਾਰੀਆਂ ਦੀ ਗਿਣਤੀ ਨੂੰ ਵੇਖਆਿ। ਇਸ ਵਿੱਚ ਸ਼ਾਮਲ ਹੈ:
- ਮੰਤਰਾਲਿਆਂ ਦੇ ਟੀਚਿਆਂ ਨੂੰ ਪੂਰਾ ਕਰਨ ਲਈ ਜ਼ੁੰਮੇਵਾਰ ਅਤੇ ਜਵਾਬਦੇਹ ਇਗਜ਼ੈਕਿਟਿਵ (ਉਦਾਹਰਨ ਲਈ, ਡਿਪਟੀ ਮੰਤਰੀ ਅਤੇ ਅਸਿਸਟੈਂਟ ਡਿਪਟੀ ਮੰਤਰੀ)
- ਕਿਸੇ ਮੰਤਰਾਲੇ ਵਿੱਚ ਕਿਸੇ ਵਿਸ਼ੇਸ਼ ਟੀਮ ਜਾਂ ਖੇਤਰ ਲਈ ਟੀਚੇ ਪੂਰੇ ਕਰਨ ਲਈ ਜਵਾਬਦੇਹ ਮੈਨੇਜਮੈਂਟ (ਉਦਾਹਰਨ ਲਈ, ਡਾਇਰੈਕਟਰ)
- ਗੈਰ-ਮੈਨੇਜਮੈਂਟ, ਜਿਵੇਂ ਕਿ ਉਹ ਅਹੁਦੇ ਜੋ ਕਿਸੇ ਯੂਨੀਅਨ ਦਾ ਹਿੱਸਾ ਹੁੰਦੇ ਹਨ, ਜਿਸ ਵਿੱਚ ਅਹੁਦਿਆਂ ਦੀ ਇੱਕ ਵਿਆਪਕ ਲੜੀ ਸ਼ਾਮਲ ਹੈ (ਉਦਾਹਰਨ ਲਈ, ਤਕਨੀਕੀ, ਖੋਜ ਅਤੇ ਨੀਤੀ, ਵਿੱਤੀ, ਵਿਗਿਆਨਕ, ਸਮਾਜ ਸੇਵਾ ਜਾਂ ਫਰੰਟ-ਲਾਈਨ ਅਹੁਦੇ)
ਇਹਨਾਂ ਭੂਮਿਕਾਵਾਂ ਵਿੱਚ ਕਰਮਚਾਰੀ ਸਥਾਈ ਜਾਂ ਸਹਾਇਕ ਅਹੁਦਿਆਂ ‘ਤੇ ਹੋ ਸਕਦੇ ਹਨ। ਸਹਾਇਕ ਅਹੁਦੇ ਉਹ ਅਸਥਾਈ ਅਹੁਦੇ ਹੁੰਦੇ ਹਨ ਜੋ ਥੋੜ੍ਹੇ ਸਮੇਂ ਜਾਂ ਮੌਸਮੀ ਕੰਮਾਂ ਲਈ ਵਰਤੇ ਜਾਂਦੇ ਹਨ। ਇੱਕ ਤਾਂ ਉਹ ਘੱਟ ਵਿੱਤੀ ਸਥਿਰਤਾ ਅਤੇ ਸੁਰੱਖਿਆ ਪ੍ਰਦਾਨ ਕਰਦੇ ਹਨ, ਅਤੇ ਨਾਲ ਹੀ ਸਥਾਈ ਅਹੁਦਿਆਂ ਦੇ ਮੁਕਾਬਲੇ ਇਨ੍ਹਾਂ ਵਿੱਚ ਲਾਭਾਂ (benefits) ਅਤੇ ਤਨਖਾਹ ਸਮੇਤ ਛੁੱਟੀਆਂ ਤੱਕ ਸੀਮਤ ਪਹੁੰਚ ਹੁੰਦੀ ਹੈ।
ਅਸੀਂ ਕੀ ਸਿੱਖਿਆ
ਸਾਲ 2024 ਵਿੱਚ, ਬੀ ਸੀ ਪਬਲਿਕ ਸਰਵਿਸ ਵਿੱਚ ਕੰਮ ਕਰ ਰਹੇ 34,900 ਤੋਂ ਵੱਧ ਲੋਕਾਂ ਨੇ ਕਰਮਚਾਰੀ ਸਰਵੇਖਣਾਂ ਵਿੱਚ ਭਾਗ ਲਿਆ। ਸਾਲ 2024 ਵਿੱਚ ਸਟਾਫ ਲਈ:
- 18.4 ਪ੍ਰਤੀਸ਼ਤ ਕਰਮਚਾਰੀ ਇਗਜ਼ੈਕਿਟਿਵ ਅਹੁਦਿਆਂ (0.6 ਪ੍ਰਤੀਸ਼ਤ) ਅਤੇ ਮੈਨੇਜਮੈਂਟ ਅਹੁਦਿਆਂ (17.8 ਪ੍ਰਤੀਸ਼ਤ) ਵਿੱਚ ਸਨ
- 81.6 ਪ੍ਰਤੀਸ਼ਤ ਗੈਰ-ਮੈਨੇਜਮੈਂਟ ਭੂਮਿਕਾਵਾਂ ਵਿੱਚ ਸਨ
- 6.9 ਪ੍ਰਤੀਸ਼ਤ ਸਹਾਇਕ ਅਹੁਦਿਆਂ ‘ਤੇ ਸਨ
ਟੀਮ ਨੇ ਬੀ ਸੀ ਪਬਲਿਕ ਸਰਵਿਸ ਦੇ ਅੰਦਰ ਹਰੇਕ ਭੂਮਿਕਾ ਵਿੱਚ ਸਾਰੇ ਕਰਮਚਾਰੀਆਂ ਦੇ ਪ੍ਰਤੀਸ਼ਤ ਨੂੰ ਇੱਕ ਮਾਪਦੰਡ ਵਜੋਂ ਵਰਤਿਆ ਅਤੇ ਹਰੇਕ ਜਨਸੰਖਿਆ ਗਰੁੱਪ ਦੇ ਪ੍ਰਤੀਸ਼ਤ ਨੂੰ ਦੇਖਿਆ ਤਾਂ ਜੋ ਇਹ ਸਮਝਿਆ ਜਾ ਸਕੇ ਕਿ ਉਹ ਮਾਪਦੰਡ ਤੋਂ ਉੱਪਰ ਹਨ ਜਾਂ ਹੇਠਾਂ।
ਸਾਲ 2024 ਦੇ ਅੰਕੜਿਆਂ ਵਿੱਚ ਪ੍ਰਤੀਨਿਧਤਾ ਦਾ ਪੱਧਰ ਸਾਲ 2022 ਵਿੱਚ ਕੀਤੀ ਗਈ ਖੋਜ ਨਾਲ ਮਿਲਦਾ ਜੁਲਦਾ ਹੈ। ਇਹ ਸਭ ਤੋਂ ਤਾਜ਼ਾ ਅੰਕੜੇ ਦਰਸਾਉਂਦੇ ਹਨ ਕਿ ਬੀ ਸੀ ਪਬਲਿਕ ਸਰਵਿਸ ਵਿੱਚ ਇੰਡੀਜਨਸ ਅਤੇ ਨਸਲੀ ਪਿਛੋਕੜ ਵਾਲੇ ਵਿਅਕਤੀਆਂ ਦੀ ਗਿਣਤੀ ਅਜੇ ਵੀ ਘੱਟ ਹੈ। ਇਹ ਗਿਣਤੀ ਮੈਨੇਜਮੈਂਟ ਅਤੇ ਇਗਜ਼ੈਕਿਟਿਵ ਪੱਧਰਾਂ ‘ਤੇ ਹੋਰ ਘੱਟ ਹੈ।
ਇਸ ਦੇ ਉਲਟ, ਗੋਰੇ ਕਾਮਿਆਂ ਦੀ ਇਗਜ਼ੈਕਿਟਿਵ ਅਤੇ ਮੈਨੇਜਮੈਂਟ ਪੱਧਰਾਂ ‘ਤੇ ਗਿਣਤੀ ਅਜੇ ਵੀ ਜ਼ਿਆਦਾ ਹੈ। ਇਨ੍ਹਾਂ ਅਹੁਦਿਆਂ ਵਿੱਚ ਆਮ ਤੌਰ ‘ਤੇ ਕਰਮਚਾਰੀਆਂ, ਬੱਜਟ, ਅਤੇ ਕਾਰਜਨੀਤਕ ਟੀਚਿਆਂ ਲਈ ਜ਼ੁੰਮੇਵਾਰੀ ਅਤੇ ਜਵਾਬਦੇਹੀ ਸ਼ਾਮਲ ਹੁੰਦੀ ਹੈ। ਉਹ ਵਧੇਰੇ ਤਨਖਾਹ ਕਮਾਉਂਦੇ ਹਨ ਅਤੇ ਉਨ੍ਹਾਂ ਦੇ ਸਰਕਾਰੀ ਫੈਸਲਿਆਂ ਵਿੱਚ ਯੋਗਦਾਨ ਪਾਉਣ ਦੀ ਵਧੇਰੇ ਸੰਭਾਵਨਾ ਹੁੰਦੀ ਹੈ।
ਜਦੋਂ ਕਿ ਸਮੇਂ ਦੇ ਨਾਲ ਪ੍ਰਤੀਨਿੱਧਤਾ ਵਿੱਚ ਬਦਲਾਅ ਆ ਸਕਦਾ ਹੈ, 2022 ਅਤੇ 2024 ਦੇ ਮਿਲਦੇ-ਜੁਲਦੇ ਡਾਟਾ ਤੋਂ ਇਹ ਸੰਕੇਤ ਮਿਲਦਾ ਹੈ ਕਿ ਵਧੇਰੇ ਵਿਭਿੰਨ ਅਤੇ ਬਰਾਬਰਤਾ ਵਾਲੀ ਪਬਲਿਕ ਸਰਵਿਸ ਤਿਆਰ ਕਰਨ ਲਈ ਹੋਰ ਟੀਚਾਬੱਧ ਕਾਰਜਨੀਤੀਆਂ ਦੀ ਲੋੜ ਹੈ। ਸਰਕਾਰ ਇਸ ਦਿਸ਼ਾ ਵਿੱਚ ਕਿਹੋ ਜਿਹੇ ਕਦਮ ਚੁੱਕ ਰਹੀ ਹੈ, ਇਹ ਜਾਣਨ ਲਈ ‘ਅੱਗੇ ਕੀ ਹੈ’ ਭਾਗ ਨੂੰ ਪੜ੍ਹੋ।
ਇੰਡੀਜਨਸ ਕਰਮਚਾਰੀ
ਬੀ ਸੀ ਪਬਲਿਕ ਸਰਵਿਸ ਵਿੱਚ ਕੰਮ ਕਰਨ ਵਾਲੇ ਫਰਸਟ ਨੇਸ਼ਨਜ਼ ਦੇ ਲੋਕਾਂ ਦੀ ਇਗਜ਼ੈਕਿਟਿਵ ਅਤੇ ਮੈਨੇਜਮੈਂਟ ਪੱਧਰਾਂ ‘ਤੇ ਘੱਟ ਨੁਮਾਇੰਦਗੀ ਹੈ।
ਮੇਟੀ (Métis) ਕਰਮਚਾਰੀਆਂ ਦੀ ਨੁਮਾਇੰਦਗੀ ਬੀ ਸੀ ਪਬਲਿਕ ਸਰਵਿਸ ਦੇ ਔਸਤ ਨਾਲੋਂ ਇਗਜ਼ੈਕਿਟਿਵ ਅਤੇ ਮੈਨੇਜਮੈਂਟ ਅਹੁਦਿਆਂ ਵਿੱਚ ਥੋੜ੍ਹੀ ਜਿਹੀ ਵੱਧ ਹੈ।
ਬੀ ਸੀ ਪਬਲਿਕ ਸਰਵਿਸ ਵਿੱਚ ਇਨੂਇਟ (Inuit) ਕਰਮਚਾਰੀਆਂ ਦੀ ਗਿਣਤੀ ਘੱਟ ਹੈ। ਬੀ ਸੀ ਪਬਲਿਕ ਸਰਵਿਸ ਵਿੱਚ ਇਗਜ਼ੈਕਿਟਿਵ ਪੱਧਰ ‘ਤੇ ਕੋਈ ਇਨੂਇਟ ਕਰਮਚਾਰੀ ਨਹੀਂ ਹਨ। ਲਗਭਗ ਅੱਧੇ ਇਨੂਇਟ ਕਰਮਚਾਰੀ ਮੈਨੇਜਮੈਂਟ ਅਹੁਦਿਆਂ ‘ਤੇ ਕੰਮ ਕਰ ਰਹੇ ਹਨ। ਇਹ ਦੇਖਣ ਨੂੰ ਭਾਂਵੇ ਵੱਧ ਅੰਕੜਾ ਜਾਪੇ, ਪਰ ਇੰਨੇ ਘੱਟ ਲੋਕਾਂ ਦੇ ਨਾਲ, ਇੱਕ ਵਿਅਕਤੀ ਦੀ ਗਿਣਤੀ ਵੀ ਪ੍ਰਤੀਸ਼ਤ ਨੂੰ ਬਹੁਤ ਬਦਲ ਸਕਦੀ ਹੈ। ਇਸ ਕਾਰਨ, ਬੀ ਸੀ ਪਬਲਿਕ ਸਰਵਿਸ ਵਿੱਚ ਔਸਤ ਪੱਧਰਾਂ ਨਾਲ ਤੁਲਨਾ ਕਰਨੀ ਔਖੀ ਹੋ ਜਾਂਦੀ ਹੈ।
6.9 ਪ੍ਰਤੀਸ਼ਤ ਦੇ ਔਸਤ ਦੀ ਤੁਲਨਾ ਵਿੱਚ, ਸਹਾਇਕ ਅਹੁਦਿਆਂ ਵਿੱਚ ਫਰਸਟ ਨੇਸ਼ਨਜ਼ ਅਤੇ ਮੇਟੀ ਦੇ ਕਰਮਚਾਰੀ ਥੋੜ੍ਹੇ ਘੱਟ ਹਨ। ਸਾਡੇ ਸੈਂਪਲ ਵਿੱਚ ਸਹਾਇਕ ਅਹੁਦਿਆਂ ‘ਤੇ ਕੋਈ ਇਨੂਇਟ ਕਰਮਚਾਰੀ ਨਹੀਂ ਸਨ।
ਨਸਲੀ ਪਿਛੋਕੜ ਵਾਲੇ ਕਰਮਚਾਰੀ
21.6 ਪ੍ਰਤੀਸ਼ਤ ਦੇ ਨਾਲ, ਬੀ ਸੀ ਪਬਲਿਕ ਸਰਵਿਸ ਵਿੱਚ ਗੋਰੇ ਕਰਮਚਾਰੀ ਇਗਜ਼ੈਕਿਟਿਵ ਅਤੇ ਮੈਨੇਜਮੈਂਟ ਦੇ ਸਭ ਤੋਂ ਵੱਡੇ ਅਹੁਦਿਆਂ ‘ਤੇ ਮੌਜੂਦ ਹਨ।
ਇਗਜ਼ੈਕਿਟਿਵ ਅਤੇ ਮੈਨੇਜਮੈਂਟ ਅਹੁਦਿਆਂ ‘ਤੇ ਕਾਲੇ, ਚੀਨੀ, ਜਾਪਾਨੀ, ਲਾਤੀਨੀ ਅਮਰੀਕੀ ਅਤੇ ਦੱਖਣ-ਪੂਰਬੀ ਏਸ਼ੀਆਈ ਕਰਮਚਾਰੀਆਂ ਦੀ ਦਰ, 3 ਪ੍ਰਤੀਸ਼ਤ ਦੇ ਅੰਦਰ, ਬੀ ਸੀ ਪਬਲਿਕ ਸਰਵਿਸ ਔਸਤ ਤੋਂ ਥੋੜ੍ਹੀ ਘੱਟ ਹੈ।
ਅਰਬ, ਫਿਲੀਪੀਨੋ, ਦੱਖਣੀ ਏਸ਼ੀਆਈ ਅਤੇ ਪੱਛਮੀ ਏਸ਼ੀਆਈ ਕਰਮਚਾਰੀ ਇਗਜ਼ੈਕਿਟਿਵ ਅਤੇ ਮੈਨੇਜਮੈਂਟ ਅਹੁਦਿਆਂ ਵਿੱਚ ਔਸਤ ਤੋਂ 3 ਪ੍ਰਤੀਸ਼ਤ ਤੋਂ ਵੱਧ ਹੇਠਾਂ ਸਨ। ਇਗਜ਼ੈਕਿਟਿਵ ਅਤੇ ਮੈਨੇਜਮੈਂਟ ਭੂਮਿਕਾਵਾਂ ਵਿੱਚ ਕੋਰੀਆਈ ਕਰਮਚਾਰੀਆਂ ਦੀ ਦਰ 9.9 ਪ੍ਰਤੀਸ਼ਤ ਸੀ।
11.9 ਪ੍ਰਤੀਸ਼ਤ ਦੇ ਨਾਲ, ਬੀ ਸੀ ਪਬਲਿਕ ਸਰਵਿਸ ਲਈ ਔਸਤ ਨਾਲੋਂ ਸਹਾਇਕ ਅਹੁਦਿਆਂ ਵਿੱਚ ਲਗਭਗ ਦੁੱਗਣੇ ਪੱਛਮੀ ਏਸ਼ੀਆਈ ਕਰਮਚਾਰੀ ਹਨ। ਅਰਬ, ਕਾਲੇ, ਫਿਲੀਪੀਨੋ ਅਤੇ ਲਾਤੀਨੀ ਅਮਰੀਕੀ ਕਰਮਚਾਰੀਆਂ ਦੀ ਨੁਮਾਇੰਦਗੀ ਸਹਾਇਕ ਅਹੁਦਿਆਂ ਵਿੱਚ ਵੀ ਬਹੁਤ ਜ਼ਿਆਦਾ ਹੈ।
ਹੁਣ ਅੱਗੇ ਕੀ
ਬੀ ਸੀ ਪਬਲਿਕ ਸਰਵਿਸ ਬਸਤੀਵਾਦੀ ਅਤੇ ਨਸਲੀ ਨੀਤੀਆਂ ਰਾਹੀਂ ਢਾਲੀ ਗਈ ਹੈ। ਪੁਰਾਣੀਆਂ ਪ੍ਰਣਾਲੀਆਂ, ਵਿਹਾਰਾਂ ਅਤੇ ਸੋਚਾਂ ਨੂੰ ਬਦਲਣ ਵਿੱਚ ਸਮਾਂ ਅਤੇ ਕੋਸ਼ਿਸ਼ ਲੱਗਦੀ ਹੈ। ਇਹ ਖੋਜ ਇੱਕ ਸ਼ੁਰੂਆਤੀ ਕਦਮ ਹੈ, ਜੋ ਬੀ ਸੀ ਪਬਲਿਕ ਸਰਵਿਸ ਵਿੱਚ ਨਸਲੀ ਸਮਾਨਤਾ ਵੱਲ ਧਿਆਨ ਖਿੱਚਦੀ ਹੈ ਅਤੇ ਇੰਡੀਜਨਸ ਤੇ ਨਸਲੀ ਪਿਛੋਕੜ ਵਾਲੇ ਲੋਕਾਂ ਦੀ ਘੱਟ-ਪ੍ਰਤੀਨਿੱਧਤਾ ਦੀ ਤਾਜ਼ਾ ਝਲਕ ਪ੍ਰਦਾਨ ਕਰਦੀ ਹੈ।
ਇਹ ਨਤੀਜੇ ਸਾਨੂੰ ਪ੍ਰਣਾਲੀਗਤ ਬਦਲਾਅ ਲਿਆਉਣ ਅਤੇ ਬੀ ਸੀ ਪਬਲਿਕ ਸਰਵਿਸ ਵਿੱਚ ਨਸਲੀ ਸਮਾਨਤਾ ਨੂੰ ਅੱਗੇ ਵਧਾਉਣ ਲਈ ਕਾਰਵਾਈ ਕਰਨ ਲਈ ਉਤਸ਼ਾਹਤ ਕਰਦੇ ਹਨ। ਖੋਜ ਦੇ ਭਵਿੱਖ ਦੇ ਪੜਾਅ ਇਸ ਗੱਲ ਨੂੰ ਸਮਝਣ ‘ਤੇ ਕੇਂਦਰਿਤ ਹੋਣਗੇ ਕਿ ਇੰਡੀਜਨਸ ਅਤੇ ਨਸਲੀ ਪਿਛੋਕੜ ਵਾਲੇ ਕਰਮਚਾਰੀ ਕਿਹੜੀਆਂ ਰੁਕਾਵਟਾਂ ਦਾ ਸਾਹਮਣਾ ਕਰ ਰਹੇ ਹਨ, ਤਾਂ ਜੋ ਉਨ੍ਹਾਂ ਨੂੰ ਹੱਲ ਕਰਨ ਲਈ ਯਤਨ ਕੀਤੇ ਜਾ ਸਕਣ।
ਬੀ ਸੀ ਪਬਲਿਕ ਸਰਵਿਸ ਏਜੰਸੀ ਇੰਡੀਜਨਸ ਅਤੇ ਨਸਲੀ ਪਿਛੋਕੜ ਵਾਲੇ ਕਰਮਚਾਰੀਆਂ ਦੀ ਬੀ ਸੀ ਪਬਲਿਕ ਸਰਵਿਸ ਵਿੱਚ ਪ੍ਰਤੀਨਿੱਧਤਾ ਨੂੰ ਬਿਹਤਰ ਬਣਾਉਣ ਲਈ ਵਚਨਬੱਧ ਹੈ। ਅਸੀਂ ਇਹ ਵੀ ਮੰਨਦੇ ਹਾਂ ਕਿ ਇੰਡੀਜਨਸ ਅਤੇ ਨਸਲੀ ਪਿਛੋਕੜ ਵਾਲੇ ਕਰਮਚਾਰੀਆਂ ਲਈ ਆਪਣੇ ਕਰੀਅਰ ਨੂੰ ਅੱਗੇ ਵਧਾਉਣ ਲਈ ਵਧੀਆ ਸਰੋਤਾਂ ਦੀ ਲੋੜ ਹੈ। ਇਸਲਈ, ਸਾਡੇ ਯਤਨ ਮੌਜੂਦਾ ਪ੍ਰੋਗਰਾਮਾਂ ਨੂੰ ਸੁਧਾਰਨ ਅਤੇ ਉਨ੍ਹਾਂ ਦਾ ਵਿਸਤਾਰ ਕਰਨ ਉੱਤੇ ਕੇਂਦਰਿਤ ਹਨ, ਜਿਵੇਂ ਕਿ ਇੰਡੀਜਨਸ ਲੀਡਰਸ਼ਿਪ ਐਂਡ ਮੈਂਟਰਸ਼ਿਪ ਪ੍ਰੋਗਰਾਮ।
ਇਹ ਪ੍ਰੋਗਰਾਮ, ਬੀ ਸੀ ਪਬਲਿਕ ਸਰਵਿਸ ਵਿੱਚ ਇੰਡੀਜਨਸ ਕਰਮਚਾਰੀਆਂ ਲਈ ਲੀਡਰਸ਼ਿਪ (ਅਗਵਾਈ ਕਰਨ ਦੀ ਯੋਗਤਾ) ਵਿਕਾਸ ਅਤੇ ਪੇਸ਼ੇ ਵਿੱਚ ਤਰੱਕੀ ਵਿੱਚ ਮਦਦ ਕਰਨ ਵਾਲੇ ਮੈਨਟਰਾਂ (ਮਾਰਗ ਦਰਸ਼ਕਾਂ) ਦੀ ਭਰਤੀ ਕਰਨ ਵਿੱਚ ਬਹੁਤ ਸਫਲ ਰਿਹਾ ਹੈ। ਇਸ ਪ੍ਰੋਗਰਾਮ ਨੂੰ ਇਸ ਤਰੀਕੇ ਨਾਲ ਤਿਆਰ ਕੀਤਾ ਗਿਆ ਹੈ ਕਿ ਇੰਡੀਜਨਸ ਭਾਗੀਦਾਰ ਨਿਯਮਤ ਤੌਰ ‘ਤੇ ਆਪਣੇ ਕਰੀਅਰ ਦੇ ਵਿਕਾਸ ਦੀਆਂ ਲੋੜਾਂ ਬਾਰੇ ਆਪਣੀ ਰਾਏ ਦੇ ਸਕਣ। ਇਸ ਰਾਏ ਨੂੰ ਧਿਆਨ ਵਿੱਚ ਰੱਖਦੇ ਹੋਏ, ਅਸੀਂ ਹੁਣ ਅਜਿਹੀ ਇੰਡੀਜਨਸ ਕੋਚਿੰਗ ਮੁਹੱਈਆ ਕਰ ਰਹੇ ਹਾਂ ਜੋ ਕਰਮਚਾਰੀਆਂ ਲਈ ਸੱਭਿਆਚਾਰਕ ਤੌਰ ‘ਤੇ ਸੁਰੱਖਿਅਤ ਅਤੇ ਗੁਪਤ ਹੋਵੇ।
ਅਸੀਂ ਇਨ੍ਹਾਂ ਪ੍ਰੋਗਰਾਮਾਂ ਦੀ ਸਫਲਤਾ ਨੂੰ ਅੱਗੇ ਵਧਾਉਣਾ ਚਾਹੁੰਦੇ ਹਾਂ ਅਤੇ ਨਸਲਵਾਦੀ ਕਰਮਚਾਰੀਆਂ ਦੀ ਲੀਡਰਸ਼ਿਪ ਅਤੇ ਮੈਨਟਰਸ਼ਿਪ ਵਿੱਚ ਸਹਾਇਤਾ ਕਰਨ ਦੇ ਨਵੇਂ ਤਰੀਕਿਆਂ ਦੀ ਪੜਚੋਲ ਕਰ ਰਹੇ ਹਾਂ।
ਸਿੱਖਣ ਅਤੇ ਵਿਕਾਸ ਦੇ ਮੌਕੇ
ਅਸੀਂ ਹਾਲ ਹੀ ਵਿੱਚ ਬੀ ਸੀ ਪਬਲਿਕ ਸਰਵਿਸ ਦੇ ਕਰਮਚਾਰੀਆਂ ਵਿੱਚ ਚਲ ਰਹੀਆਂ ਗੱਲਾਂ ਬਾਤਾਂ ਅਤੇ ਸਿੱਖਣ ਦੀ ਪ੍ਰਕਿਰਿਆ ਨੂੰ ਸਹਾਇਤਾ ਦੇਣ ਲਈ ਨਸਲਵਾਦ-ਵਿਰੋਧੀ ਅਤੇ ਨਿਰਪੱਖਤਾ-ਕੇਂਦਰਿਤ ਨਵੇਂ ਸਰੋਤ ਪੇਸ਼ ਕੀਤੇ ਹਨ। ਇਨ੍ਹਾਂ ਵਿੱਚ ‘ਬੀ ਸੀ ਪਬਲਿਕ ਸਰਵਿਸ ਵਿੱਚ ਨਸਲਵਾਦ-ਵਿਰੋਧ’ ਸਿੱਖਿਆ ਦਾ ਮਾਰਗ ਸ਼ਾਮਲ ਹੈ, ਜੋ 2024 ਵਿੱਚ ਜਾਰੀ ਕੀਤਾ ਗਿਆ ਸੀ।
ਡੈਕਲੇਰੇਸ਼ਨ ਐਕਟ ਐਕਸ਼ਨ ਪਲੈਨ (Declaration Act Action Plan) ਦੀ 3.1 ਵਚਨਬੱਧਤਾ ਦੇ ਹਿੱਸੇ ਵਜੋਂ, ਅਸੀਂ ਇੰਡੀਜਨਸ ਭਾਈਚਾਰਿਆਂ ਦੇ ਸਾਥ ਨਾਲ ਇਕੱਠੇ ਮਿਲ ਕੇ ਇੱਕ ਨਵਾਂ ਲਾਜ਼ਮੀ ਲਰਨਿੰਗ ਕੋਰਸ ਤਿਆਰ ਕਰ ਰਹੇ ਹਾਂ: ਇੰਡਿਜਨਸ-ਕ੍ਰਾਊਨ ਰਿਲੇਸ਼ਨਜ਼ ਇਸੈਨਸ਼ਲਜ਼ (Indigenous-Crown Relations Essentials)। ਇਹ ਕੋਰਸ ਬੀ ਸੀ ਪਬਲਿਕ ਸਰਵਿਸ ਦੇ ਕਰਮਚਾਰੀਆਂ ਨੂੰ ਇੰਡੀਜਨਸ ਲੋਕਾਂ ਦੇ ਅਧਿਕਾਰਾਂ ਨੂੰ ਕਾਇਮ ਰੱਖਣ ਵਿੱਚ ਉਨ੍ਹਾਂ ਦੀਆਂ ਜ਼ੁੰਮੇਵਾਰੀਆਂ ਨੂੰ ਸਮਝਣ ਵਿੱਚ ਸਹਾਇਤਾ ਕਰਦਾ ਹੈ।
ਇਹ ਕੋਰਸ ਮੁੱਖ ਸ਼ਬਦਾਵਲੀ ਦੀ ਵਿਆਖਿਆ ਕਰਦਾ ਹੈ, ਬਸਤੀਵਾਦ ਨੂੰ ਇੰਡੀਜਨਸ-ਵਿਰੋਧੀ ਨਸਲਵਾਦ ਦੀ ਜੜ੍ਹ ਵਜੋਂ ਪਛਾਣਦਾ ਹੈ ਅਤੇ ਪਛਾਣਦਾ ਹੈ ਕਿ ਕਨੂੰਨਾਂ ਨੂੰ ਜਾਇਜ਼ ਠਹਿਰਾਉਣ ਲਈ ਇੰਡੀਜਨਸ-ਵਿਰੋਧੀ ਨਸਲਵਾਦ ਦੀ ਵਰਤੋਂ ਕਿਵੇਂ ਕੀਤੀ ਗਈ ਸੀ। ਅਸੀਂ ਇਹ ਯਕੀਨੀ ਬਣਾਉਣ ਉੱਤੇ ਧਿਆਨ ਦੇ ਰਹੇ ਹਾਂ ਕਿ ਸਮੁੱਚੇ ਬੀ ਸੀ ਪਬਲਿਕ ਸਰਵਿਸ ਵਿੱਚ ਇਹ ਲਾਜ਼ਮੀ ਕੋਰਸ ਇੰਡੀਜਨਸ ਕਰਮਚਾਰੀਆਂ ਨੂੰ ਕੋਈ ਨਵਾਂ ਨੁਕਸਾਨ ਪਹੁੰਚਾਏ ਬਿਨਾਂ ਦਿੱਤਾ ਜਾਵੇ।
ਪਿਛਲੇ ਕਈ ਸਾਲਾਂ ਤੋਂ ਬੀ ਸੀ ਪਬਲਿਕ ਸਰਵਿਸ ਵਿੱਚ ਔਨਲਾਈਨ ਕੋਰਸ ‘ਡਾਈਵਰਸਿਟੀ ਐਂਡ ਇਨਕਲੂਯਨ ਇਸੈਨਸ਼ਲਜ਼’ (Diversity and Inclusion Essentials) ਸਿੱਖਣਾ ਲਾਜ਼ਮੀ ਰਿਹਾ ਹੈ। ਇਹ ਕੋਰਸ ਦੱਸਦਾ ਹੈ ਕਿ ਕੰਮ ਦੀਆਂ ਥਾਂਵਾਂ ਨੂੰ ਭੇਦਭਾਵ ਤੋਂ ਮੁਕਤ ਰੱਖਣ ਲਈ ਕਰਮਚਾਰੀਆਂ ਨੂੰ ਕੀ ਕਰਨ ਦੀ ਲੋੜ ਹੈ। ਇਸ ਵਿੱਚ ਨਸਲਵਾਦ-ਵਿਰੋਧੀ ਪਰਿਭਾਸ਼ਾਵਾਂ ਸ਼ਾਮਲ ਹਨ ਅਤੇ ਇਹ ਕਦਰਾਂ-ਕੀਮਤਾਂ ਦੇ ਅਧਾਰ ‘ਤੇ ਸ਼ਮੂਲੀਅਤ ਨੂੰ ਉਤਸ਼ਾਹਤ ਕਰਦਾ ਹੈ।
ਇਸ ਤੋਂ ਇਲਾਵਾ, ਭਰਤੀ ਕਰਨ ਵਾਲੇ ਮੈਨੇਜਰਾਂ ਨੂੰ ਭਰਤੀ ਦੇ ਸਮਾਵੇਸ਼ੀ ਤੌਰ-ਤਰੀਕਿਆਂ ਨੂੰ ਸਮਝਣ ਅਤੇ ਵਰਤਣ ਵਿੱਚ ਮਦਦ ਕਰਨ ਲਈ ਸਿਖਲਾਈ ਵੀ ਪ੍ਰਦਾਨ ਕੀਤੀ ਗਈ ਹੈ, ਜਿਵੇਂ ਕਿ ਤਰਜੀਹੀ ਬਿਆਨਾਂ ਦੀ ਵਰਤੋਂ ਕਰਨਾ, ਜੀਵਨ ਦੇ ਤਜਰਬਿਆਂ ਨੂੰ ਧਿਆਨ ਵਿੱਚ ਰੱਖਣਾ, ਅਤੇ ਭਰਤੀ ਪੈਨਲਾਂ ਵਿੱਚ ਵੱਖ-ਵੱਖ ਪ੍ਰਤੀਨਿਧੀ ਸ਼ਾਮਲ ਕਰਨ ਨੂੰ ਯਕੀਨੀ ਬਣਾਉਣਾ।
ਇੰਡੀਜਨਸ ਅਤੇ ਨਸਲੀ ਪਿਛੋਕੜ ਵਾਲੇ ਕਰਮਚਾਰੀ ਇਸ ਕੰਮ ਸਬੰਧੀ ਚੱਲ ਰਹੀ ਚਰਚਾ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਉਂਦੇ ਹਨ। ਬੀ ਸੀ ਪਬਲਿਕ ਸਰਵਿਸ ਏਜੰਸੀ, ਸੰਸਥਾ ਭਰ ਦੇ ਕਰਮਚਾਰੀਆਂ ਨਾਲ ਸੰਪਰਕ ਕਰੇਗੀ ਤਾਂ ਜੋ ਉਹਨਾਂ ਦੇ ਤਜਰਬਿਆਂ ਅਤੇ ਪੇਸ਼ਿਆਂ ਵਿੱਚ ਆਉਣ ਵਾਲੀਆਂ ਰੁਕਾਵਟਾਂ ਨੂੰ ਸਮਝਆਿ ਜਾ ਸਕੇ। ਇਹ ਜਾਣਕਾਰੀ 2025 ਵਿੱਚ ਜਾਰੀ ਹੋਣ ਵਾਲੀ ਨਵੀਂ ਕੌਰਪੋਰੇਟ ਸਮਾਨਤਾ, ਵਿਭਿੰਨਤਾ ਅਤੇ ਸਮਾਵੇਸ਼ੀ ਕਾਰਜਨੀਤੀ ‘ਵੇਅਰ ਵੀ ਔਲ ਬਿਲੌਂਗ’ (Where We All Belong) ਨੂੰ ਆਕਾਰ ਦੇਣ ਵਿੱਚ ਮਦਦ ਕਰੇਗੀ।
ਹੋਰ ਜਾਣੋ
ਇਹ ਵੈੱਬ ਪੇਜ ਬੀ ਸੀ ਪਬਲਿਕ ਸਰਵਿਸ ਵਿੱਚ ਨੁਮਾਇੰਦਗੀ ਸੰਬੰਧੀ ਹੋਈ ਖੋਜ ਦੇ ਸਰਲ ਸੰਖੇਪ ਨੂੰ ਪੇਸ਼ ਕਰਦਾ ਹੈ। ਖੋਜ ਬਾਰੇ ਹੋਰ ਜਾਣਨ ਲਈ ਤਕਨੀਕੀ ਰਿਪੋਰਟ ਪੜ੍ਹੋ, ਇਸ ਵਿੱਚ ਵਿਸ਼ਲੇਸ਼ਣ ਕਿਵੇਂ ਕੀਤਾ ਗਿਆ ਸੀ, ਅਤੇ ਵੱਖ-ਵੱਖ ਅਬਾਦੀ ਸਮੂਹਾਂ ਅਤੇ ਨੌਕਰੀ ਦੇ ਅਹੁਦਿਆਂ ਬਾਰੇ ਕੀ ਪਾਇਆ ਗਿਆ ਸੀ ਸੰਬੰਧੀ ਜਾਣਕਾਰੀ ਸ਼ਾਮਲ ਹੈ।